唔知係咪李安拍張愛玲原著嘅《色，戒》收得，呢排好多人都將電影裏面嘅漢奸故事，演繹到現實生活。但係土共老左轟民主黨嘅馬丁喺《華爾街日報》撰文，呼籲美國總統喬治布殊借北京辦奧運機會關注中國人權，就變成漢奸、走狗，除咗水平之高低路人皆見之外。原來亦都表明，隨住年月嘅推演，「反清復明」或者係二次大戰年代嘅漢奸，到今時今日，定義已經唔同晒。𠵱家嘅漢奸就好似求其行過街市，都可以低價執番幾件。
陳日君樞機噚日話，好多鬧馬丁係漢奸嘅人，其實都未睇過馬丁到底寫咗啲乜，總之貪口爽，噏得出就噏，即係話，但凡有人用英文（或者其他外文）寫咗篇文章攞去外國發表，就可以構成「漢奸罪」，唔理你有冇叫人唔好杯葛或者抵制北京奧運會，連斷章取義都唔需要，因為新嘅漢奸定義，支持乜嘢並唔重要，「用英文寫畀鬼佬睇」就已經係鐵證。
人人都可以係易先生
推而廣之，識得外國朋友、去吓外國同人講吓睇法，加埋好似陳樞機咁，周不時去羅馬搵洋人研究聖經，正如佢老人家話齋，佢其實都係漢奸。當然啦，有啲土共老左權威有扣帽子特權，好似只有佢哋講，邊啲人先至愛國，即係話，只要曾憲梓、譚耀宗等人唔話你係「愛國人士」，閣下就想愛都冇得愛，相反，如果佢哋指邊個係漢奸，呢頂「漢奸帽」就只可戴上不可除低。
咁講法，只要係華籍、有身份證，甚至有眼耳口鼻嘅，都會成為漢奸一族。
時移世易，當年漢奸只有吳三桂、汪精衞同張愛玲筆下嘅易先生，數得出嘅人唔多，但𠵱家嘅香港，由於識啲英文、俾人扣吓帽子、有眼耳口鼻嘅人，都會成為漢奸，所謂「是他也是你和我」漢奸已經成為社會嘅相當主要群體。
如今做漢奸既唔係害人或者損害國家利益，反而係支持改善人權。89年後喺大陸被判刑嘅香港居民羅海星，因為當年英國首相馬卓安訪華獲得釋放，大陸民運人士魏京生亦喺97年因為美國介入，至得以保外就醫，如果同意用呢種方法令到兩人獲釋就係漢奸嘅話，大家係咪都會好樂意舉起身份證都要直認「我係漢奸」呢。
動輒得咎漢奸新解
1.識寫英文，譬如A-Z
2.文章刊登外國傳媒，可優先認定資格
3.提及祖國（唔理原文原意），更加唔使審
4.勾結外部勢力，譬如去外國旅行，跟老外做朋友（連同菲傭講嘢都唔得），仲唔係漢奸！
5.其實都唔使條件，甚至毋須斷章取義，話你係就係！
6.所以有眼耳口鼻，都可以係漢奸