蘇施黃出名識飲識食之外，「寸爆」態度都享譽娛樂圈，一見到唔鍾意就會藐嘴藐舌，相信唔少人都領過嘢。
正所謂物以類聚，蘇施黃原來好鬼欣賞政壇寸人葉劉淑儀。葉太有幾寸？唔使講大家都記得啦：戴住個黑超出席學生會論壇、畀居港權人士圍堵就施施然喺架車度睇雜誌……呢啲人家眼中嘅「寸寸槓」行為竟然令蘇施黃好受落，話葉太係唯一一個會令自己哈哈大笑嘅政壇中人。蘇施黃仲話，尤其欣賞葉劉當年冷對外間指摘堅決捍衞髮型嘅態度。
力撐態度唔使改
另類嘅嘢未必有好多人欣賞，蘇施黃都係咁話，所以佢話至少要有少少幽默感嘅人先至識得欣賞葉劉。蘇施黃不諱言，葉太同佢一樣為人率直兼夾講嘢好鬼乞人憎，對唔滿意嘅嘢仲藐嘴藐舌；雖然呢啲態度一般人都會難以接受，但蘇施黃就覺得葉劉一啲都唔使改，事關做圓滑嘅人好容易咋，要保持到真性情就難度好高。
其實蘇施黃咁撐葉劉，除咗性格相近，相信因為佢哋同樣係聖士提反女校嘅校友，但死都唔肯講相差幾年。蘇施黃大爆葉劉讀書年代係書獃子，同佢呢啲康樂組組長完全唔啱玩，仲笑佢呢挺讀書人煮餸一定唔好食，搞到葉劉好尷尬。