大市直情熱火冲天，連續兩日共升逾1000點後，噚日更大升近1200點，期指大升近1400點，高水成200點。升市莫估頂，超級大牛市更不能逆市而行，否則金山都唔夠輸。亞洲股神睇33000點，個市咁升法，話唔定幾日就到。其實，股神嘅睇法已經算保守，唔少中資已賭緊年底前見36000點。
中石油（857）A股上市，凍結嘅資金係天文數字，總數34000億元，內地民間啲錢多到你想像唔到嘅，唔好話我哋普羅股民聽到會嘩一聲，就算係揸住成千億元舞來舞去嘅芬佬，心頭都會震一震。中央若真係正式「放水」到香港，幾乎可以話冇一個基金同大行可以「玩對抗」。仲有，人民幣噚日又再創出新高，如虎添翼。
一個月來，推介過3家內地銀行，分別係中國銀行（3988）（9月25日）、交通銀行（3328）（10月15日）同建設銀行（939）（10月26日），其中中行目標4.80元，已到價，交行睇13.60元，噚日最高見14.90元，已超額完成；建行短線目標8.50元，短短3日，已升上8.29元，要達標，應冇問題。
交行業績肯定正
交行今日派中期成績表，宣佈前股價咁升法，肯定係好理想。交行噚日收14.24元，升1.36元，升幅10.5%，月中推介嘅C輪7555，噚日一日就大升28.7%，見0.56元。早輪已提過，交行係中資嘅新貴，果然有突出表現。
內地銀行今年賺大錢，建行最新宣佈的第三季業績，就大賺228億元，按年增長高達90%，帶動首三季淨利潤上升至571億元，去年全年係463.2億元。建行預測PE可調低到25倍，而交行有機會落返30倍以下。
睇好中行吼9099
中行噚日最高4.89元，收4.83元，升2.9%，同交行及建行相比，仲係大落後，以今年預測PE在20倍以下，股價應尚有「大把」上升空間。
中行已創出上市以來的高收市紀錄，MACD亦會再出現「雙牛」入市訊號，短線上升目標指向5.50元。看好中行，可留意C輪9099，中行若見5.50元，就算平水，9099都可見1.33元，升43%。