周杰倫（Jay）將於下月10日喺台灣舉行「周杰倫07-08世界巡迴演唱會」第一站，12月就輪到香港站，暫定12月5日至9日、11日至12日喺紅館演出7場。噚日Jay喺內地趕嚟香港麗嘉酒店出席記者會，逗留3粒鐘又飛返台灣，見佢戴住黑超都難掩倦容，司儀雲妮幫佢解釋話太攰有黑眼圈先戴墨鏡，而唔係扮cool，又笑佢要開「倫倫熊貓演唱會」。
「最重要票房好」
Jay事後解釋香港7場個唱中間斷咗一日，係為咗保持演出水準，所以休息一日，佢已經請咗三位靚仔做嘉賓，𠵱家等對方回覆。至於有冇靚女嘉賓，Jay起初話怕傳緋聞，後來又話想請桂綸鎂，但對方到時要出席金馬獎頒獎禮，應該嚟唔到。
講開金馬獎，Jay自導自演嘅《不能說的…秘密》全部大獎唔入圍，佢話聽到好震驚，啲工作人員失望到想喊，佢嘅心情雖然未至於跌落谷底，但都好失望，佢話：「我們拍電影是為大部份人，不是為小部份人，比賽不代表好或不好，最重要票房好，我第一次做導演就可以和李安一齊入圍『最佳工作者』（即台灣最佳電影工作者），這名字好cool。」Jay話桂綸鎂冇入圍最佳女主角，佢好驚訝。
被問到最近同蔡依林（Jolin）唱片公司展開罵戰，Jay話自己係抱打不平心態，仲話：「我和Jolin不會互相攻擊，是她公司那人問題，我的行為會影響小孩，總之銷量不重要，名譽較重要，做事要對得起良心。」
