商品大王羅傑斯（JimRogers）近日又再發表驚人言論，預期人民幣在中國經濟強勁增長下，未來10年會升值4倍，是最有投資價值的貨幣，更表示目前正將手上美元資產及投資脫手，全力掃入人民幣資產。
掃入人民幣資產要夠大注又夠實在，當然是國內房產，但外資買樓限制太多，夠流通量則肯定係H股，但不少H股現價已相當高昂，再其次，應該係揀無乜點升過，以國內資產為主嘅紅籌股，上星期唔少紅籌股出現特大成交急升，的確係有錢入咗去。
再退一步，應該要睇番啲揸住國內物業，卻因二三線股身份而無升過嘅內房股，最近獲另一個亞洲股神東尼點評嘅星獅地產（535），正是此中代表。
星獅地產大股東為新加坡的龍頭藍籌股星獅集團，在香港卻淪為無乜人識嘅三線股，之所以獲東尼睇好，因其NAV為0.23元，較其推介時股價僅有輕微溢價。
業績或有驚喜
相對之下，碧桂園（2007）現價為NAV的12倍，便顯得十分誇張，睇埋其他內房股，中國海外（688）現價係NAV嘅7.5倍、雅居樂（3383）係7.8倍，同樣溢價唔細。星獅上半年度已轉虧為盈，錄得盈利1.11億元，每股獲利1.63仙，以下半年度國內樓市銷情，將於本周五公佈之全年業績或有驚喜，若見大升市唔知買乜，星獅都係一個唔錯嘅選擇。
七星值博率高
上星期四細價股紛紛起動，不過炒得一日又跌返落去。市場口味雖然轉得快，惟假如相信市場資金係唔會停嘅話，二三線股一定會炒到。曾在今年上半年股價急升10倍，獲Keywise入股兼有美林等大行出報告唱好嘅中國七星（245），4月見頂後至今跌足半年，睇番股權紀錄，大股東本月已兩度增持，Keywise無減持不特止，年中更頻頻增持，一啲都唔似散水格局，從高位跌咗7成嘅中國七星，低位買入，值博率高。