上個禮拜報章話，政府終於為任期無限嘅金管局總裁任志剛設限，究竟係咪只可以續約多兩年仲未揭盅，但喺金管局做咗成14年嘅任總，掌管幾千億外滙儲備，98年擊退炒家索羅斯，雖然薪高無王管，但網上都有好多「粉絲」。
Moby2004就支持任總留任，「睇戰績，呢十幾年香港金融穩定，外滙基金又升到幾千億，政府年年分幾百億，淨係咁都值得留低。」虛暝亦話：「好驚白頭佬走咗之後，香港會好似美國咁，格老走人，阿伯又未學滿師，搞出個次按大頭佛。」
除咗實戰嘅戰績，更多粉絲由外表出發，好似Tktnys話：「任總唔似60歲喎，如果染番黑啲頭髮，衣着搞搞佢，似40歲左右。」Laohu就中肯啲：「40歲又唔止，似45歲啦，不過如果佢仲有能力，冇因為老咗而影響判斷力，都支持佢再做耐少少嘅。」
不過，Johntt就認為任總做唔做冇乜所謂，「舊嘅唔去，新嘅唔嚟，使唔使好似大陸以前嘅領導人咁，做到鞠躬盡瘁呀？」Kunzite亦話，「人總係要換，但就唔好規定任期，費事滿任時，俾人搵個藉口，搞亂個市就唔好啦。」Kh430就諗，「唔知到時，任總會唔會學格老咁，得閒就出嚟噏兩句，等個市玩吓過山車。」