鄭裕玲（嘟姐）前晚在澳門威尼斯人度假村，為意大利珠寶品牌Damiani新店開幕任剪綵嘉賓，以總值2,200萬元珠寶示人，問她呂方閒時有否送珠寶𠱁她開心，嘟姐笑指呂方對珠寶一無所知，以為大細同價，問到無綫台慶視后人選，嘟姐表示不出大契、細契之爭，她個人則希望大契司棋姐能奪獎。
意大利珠寶品牌Damiani位於澳門威尼斯人度假村的專門店，前晚開幕，邀得鄭裕玲擔任剪綵嘉賓，她前晚戴上品牌價值2,200萬元的珠寶，貴氣迫人，嘟姐說：「我10幾年前已經幫襯呢個牌子，嗰時未有舖，就幫襯連卡佛買。」
拒透露珠寶藏量
問嘟姐個人珠寶收藏有否達千萬元？她笑說：「呢個問題以保安理由唔透露得。」她又指10多年未有到過澳門，現時當地發展迅速，上月她與朋友重臨，主要是參觀新建設及飲飲食食，卻未有落注賭兩手，她說：「我從來唔賭錢，年年都去拉斯維加斯登台，都冇興趣賭。」
再問嘟姐男友呂方有否送珠寶𠱁她開心？她說：「佢都唔識（珠寶）嘅，以為大細同價㖭呀。」嘟姐又透露無綫台慶夜當晚的晚裝珠寶，已有多個贊助商接洽她，問到視后熱門人選，她說：「都不出大契、細契之爭啦，我自己就希望大契司棋姐會攞獎。」
安安生日收戒指
此外，剛過了47歲生日的余安安，前晚穿上Dolce&Gabbana服裝出現，她指甚少賭錢，她說：「除非氣氛好好啦。」又指今年生日收到不少禮物包括腕錶戒指等。問余安安是否靚仔朋友送她戒指？她說：「我幾時話係靚仔送啫？朋友知我貪靚咪送戒指畀我囉。」問她前夫李萬祺有否送禮給她？她一聽即不悅說：「我生日唔關佢事，關我阿媽事啫。」
採訪：JessicaNgan
攝影：ChanShunChing
