詹瑞文早前宣傳舞台劇《萬千師奶賀台慶》，扮港姐、汪明荃同陳志雲，搞到得罪無綫慘遭雪藏，原定為無綫主持嘅兒童節目突然被抽起，噚日阿詹喺旺角宣傳《萬》劇，宣佈加開八場，無綫都冇派人去採訪，只得有線撐場，所以阿詹喺台上都不避嫌大玩雪藏噱頭，仲匿喺雪櫃話要被雪，認真搞笑。
阿詹話收到無綫書面通知，解釋個兒童節目係因為節目調動抽起，不過佢對解釋唔多滿意。
「個劇係講電視文化」
阿詹話：「佢哋今日冇嚟採訪，我就冇乜所謂，我一直強調個劇係講電視文化，唔係只係講TVB。」
另外，無綫總經理陳志雲嘅honey鄧健泓同八位味之天使，噚日喺馬鞍山新港城中心出席《味分高下賀台慶》宣傳，順勢為該節目喺台慶頒獎禮度獲三項提名拉票，陳志雲亦到場支持。
問陳志雲係咪力撐honey鄧健泓攞獎？佢好大反應咁話：「每場巡迴展覽我都有出席，我梗係唔可以講睇好邊個攞獎，不過我都要講私底下佢從來唔係咁叫我，我又唔係咁稱呼佢。」鄧健泓就話：「我講咗好多次我真係冇咁叫佢，我介意大家咁講。」
