報紙報道，旅遊業人才缺乏，特別係酒店方面，一啲讀酒店系嘅學生，畢業後唔肯入酒店做，因為做酒店要從低做起，太辛苦喎。不少人以為做酒店職員，身光頸靚，見盡名人，於是去讀酒店系，殊不知酒店人係前面歡笑，後台悲辛。一位著名酒店嘅高層，掌管一個部門嘅亞洲區，成日飛嚟飛去，佢位姪仔見到咁好玩，又話要讀酒店系，於是屋企送佢去澳洲讀，首先學托餐、開酒、清潔，少爺仔打電話返屋企話畀阿媽聽，開啤酒時割傷咗手指，阿媽喊起嚟，阿嫲立即喝令乖孫退學，讀過第二科。女高層對左丁山講：「我位姪仔都唔知我初出道之時，做咗四年frontoffice，吃過不少辛酸與捱更抵夜。」
呢日見到旅遊L，佢話中文大學附近嘅酒店已經平頂，係新世界集團嘅，除正常營運外，並與中文大學酒店學院合作，中大酒店系學生可以在新酒店內實習與學習，對培養酒店人才好有幫助。事實上，亦只有中文大學酒店學院先至有一間教學酒店在校園外面，可講得係得天獨厚。旅遊L正與中大傾緊培訓及實習計劃，希望酒店系啲學生真係投身酒店工作，唔好怕辛苦。
人才培訓，係現代企業管理之最大挑戰，即使係酒樓集團，例如鴻星，都辦咗一間「鴻星大學」，專門培訓集團員工，請大學教授、講師兼職講授團隊合作、企業文化、營銷、服務等等課程。左丁山問過鴻星一位女高層：「你地唔怕為他人作嫁衣裳咩？」女高層話：「唔怕得咁多咯，自己集團有需要吖嘛，希望教十個，留得到七個都好吖。你知唔知道好難請人㗎？報紙成日講基層市民冇工作，其實我哋請清潔洗碗女工，六千零蚊一個月都請唔夠人呀！」咦，政府又話要搞最低工資三四千蚊？
生意好嘅食肆的確係要請多啲人嘅，國金二期嗰間利苑，生意旺到爆燈，呢日左丁山訂咗位一點，未夠一點去到，接待員話未有位住，請稍候，等到正在不耐煩之際，見到陸博士、賓架F、經濟L等名人湧至，唯有等囉，經濟L仲潤左丁山一句：「訂呢間利苑，要早兩三個禮拜預訂㗎！」股市大旺，國金二期最貴嗰間食店可謂食正條水。