香港三位同時出身於TVB的頂尖導演杜琪峯、林嶺東與徐克相識30載，他們在影壇一直是各自發展，直至03年香港發生沙士疫症，徐克發現人與人之間出現了危機，每個人出街都戴上口罩，手也不能握，有些朋友更因沙士離世，他開始越來越珍惜身邊的人和事，覺得需要有人走出來團結香港精神。在一個飯局中，他向林嶺東與杜琪峯提出了以接龍形式聯合執導電影《鐵三角》的構思，兩位導演都欣然接受了這個破天荒的挑戰。 撰文：陳月媚
杜琪峯的俠義情懷、徐克的天馬行空與林嶺東的人性刻畫，三位導演風格各異，聯合一起執導一部戲，首先由老徐佈局，阿東搞局，阿杜解局，拍攝時三位導演在創作上互不干涉、互不溝通，各自帶自己的幕後班底以相同期限及製作費拍攝30分鐘故事來湊合成一部電影，想不到三位南轅北轍導演可以將《鐵》片拍得環環相扣，這個前所未有的新嘗試竟會有如此大驚喜給觀眾。
他們三位好朋友，首次合作拍一部戲，其實他們在開工前實在擔心會因各自主觀的性格而影響友情，而事實上他們三個人在開戲前談這個合作計劃時，沒有一樣東西是一致同意的。
輪迴改名東嶺林
三位導演日前在銀河映像公司接受專訪時，徐克首先表示：「合作前我已經好奇，我哋三個會嘈起嚟，如果反面點算？我哋喺開戲前曾經坐低傾咗6個鐘，傾咗咁耐竟然冇一樣嘢係互相認同嘅，但開會氣氛係笑聲不停，到個會開完，最後一句問我哋究竟搞唔搞，大家都話搞，咁咪各有各去搞囉！」
影片首段是由徐克拍攝，負責接第二棒的林嶺東看過徐克的30分鐘戲後，他就要想辦法將故事發展下去，究竟對他來說有沒有難度呢？
林嶺東笑說：「我覺得佢已經留畀我好多嘢啦，佢留畀我一個故事、一個箱同埋幾個人物，已經好足夠。」
看過之前兩位導演的故事後，最後一部份輪到杜琪峯來結局，他又如何收場呢？
杜琪峯：「其實我拍最後一段戲完全冇壓力，當初佢哋點拍，我嗰部份一定係結局，一定要喺我部份講完個古仔，所以我冇其他想法，只係佢哋點樣走，我都要走埋終點。」
林嶺東03年執導《情逢敵手》後，一直處於休息狀態，不斷推掉片約，今次何以會破例出山？
「當初收山，係因為覺得自己都拍咗成30年戲，乜都拍過晒，所以想休息吓！考驗吓自己唔拍戲得唔得，點知老徐搵我拍《鐵三角》，我覺得如果拍三分一戲都唔拍，咁就真係以後唔使拍戲啦，以前嘅林嶺東已經唔存在啦。𠵱家重新出嚟嘅我，經過輪迴後，已經改名叫東嶺林，我發現自己仲係好鍾意拍戲嘅。」坐在旁邊的老徐與阿杜對他輪迴與改名理論都忍俊不禁。
「係導演又係觀眾」
每位導演拍片都有自己風格，今次每人只拍三分一，究竟是否滿意其餘兩位導演所拍的部份呢？
徐克不假思索說：「係絕對滿意，成部戲湊合起嚟，我有好大驚喜。」林嶺東：「阿杜承接我嗰部份好精采，我睇嘅時候，覺得自己又係導演又係觀眾，呢個經驗係從未有過，我係冇諗過佢會咁拍，因為我一定唔會咁拍，但佢嘅拍法，係好有追看性，而老徐嘅開場就畀咗好多想像空間我。」
杜琪峯：「每個導演拍嘢都會好主觀，好難講好壞，拍之前又講明唔可以改其他導演嘅嘢喎，所以點都要埋尾，有不足地方都係呢部戲嘅特色。我覺得林嶺東拍嘅部份，手法已經冇以前咁沉重，阿徐嗰部份空間好闊，作為起步者，佢將故事引申咗好多嘢畀阿東去發展，到阿東嗰部份，佢講咗好多友情同愛情，而且拍得幾深入，到我埋尾時，其實佢哋已經交低咗好多嘢畀我。」
月旦鐵三角名作各有絕招
他們三位導演在娛樂圈相識了30年，同樣熱愛電影，是十分投緣的好朋友，完全沒有同行如敵國之心，反而是互相欣賞。且看他們如何品評自己的老友。
徐克：「阿杜係一位生命力好強嘅導演，不停咁轉變，佢最厲害係不停有作品面世，完全冇受香港不景氣影響，用人同題材都有一手，總之同樣俾其他導演用過嘅人或拍過嘅題材，擺喺佢手就完全唔同，我好開心香港可以有咁嘅導演。喺佢作品入面，好以《黑社會》、《審死官》、《放．逐》同《孤男寡女》等我都好喜歡。至於阿東，佢拍戲特色係好有爆炸力，好陽剛，佢拍浪漫題材一樣係好有爆炸力，但又往往可以觸動觀眾情緒，佢喺全世界嘅導演入面應該有一個位置，希望佢輪迴之後，會畀另一個驚喜我哋。佢嘅風雲系列作品，我係好喜歡。」
阿杜：「我同阿東喺無綫訓練班時認識，當時佢拍嘅電視已經好紮實，覺得呢個人拍嘢好厲害，後來佢移民加拿大返嚟，拍咗一系列風雲片，絲毫以前拍電視嘅痕迹都冇，而且佢好擅於將演員發揮到極點，我唯一係唔鍾意佢拍西片，完全唔係佢世界，後來佢返嚟拍嘅《目露兇光》我就好鍾意啦！而老徐由電視台嗰陣開始，我已經覺得佢拍嘢好厲害，睇佢拍《家變》同《金刀情俠》，人人咁拍，你就睇到佢唔會咁拍，佢當時嘅功力，好多導演都話望塵莫及，到佢進軍影壇拍《第一類型危險》，真係睇到你有透唔到氣嘅感覺，佢喺利用場景同演員方面能力好高，又勇於創新，佢拍嘅《蝶變》、《蜀山》同《東方不敗》等，我都好喜歡。」
林嶺東：「我認為喺香港電影史入面，阿杜同老徐應該可以企喺好前位置，自從《十萬火急》開始，我發現阿杜拍攝手法同創作意念有咗好大轉變，拍槍戰片都可以拍到啲演員有大俠感覺。不過佢好奇怪成日拍一種題材，又鍾意用嚟用去都係同一班演員。老徐係一位喺創作意念上好天馬行空嘅導演，睇完佢部《蝶變》，你會嘆為觀止，覺得好精采，佢係一位不受任何思想規範嘅導演，佢拍嘅《黃飛鴻》、《東方不敗》等我都好喜歡。」
闖荷李活取長補短
林嶺東和徐克先後闖過荷李活拍西片，但兩者似乎都不太適應，最終都回歸拍華語片，對於阿杜即將要闖荷李活，他們兩位會否寄語祝福呢？
徐克：「阿杜係應該去，唔應該局限喺香港發展，去了解吓人哋嘅文化同歷史，可能會引發到更多題材，當然要一定時間去適應人家嘅制度，不過我對佢闖荷李活有信心，佢好有自己睇法。」
擴闊視野有裨益
阿東：「我覺得阿杜去荷李活拍戲冇問題，佢會有機會跑出嚟，其實香港好多導演拍西片唔成功，可能係犯咗一個通病，就係不自覺咁喺電影入面擺咗好多香港意識形態落去，我哋始終唔係外國人，點知紐約黑幫係點，正如叫馬田史高西斯翻拍《無間道》，我就覺得香港版拍得仲有味道啦！始終兩地文化唔同。」
雖然阿杜明白在荷李活拍片會遇到很多限制，不會像他在香港，可以凌駕一切，他也不得不承認兩位好友阿東與老徐的西片作品都不及拍華語片精采，但他還是有興趣一試拍西片感覺，因為去了解人家的長處，擴闊自己視野，始終對將來拍戲有裨益。
杜琪峯
‧1955年出生，現年52歲
‧1973年加入無綫藝員訓練班入行，畢業後轉做幕後
‧1980年拍攝首部電影《碧水寒山奪命金》
‧1996年與韋家輝組成銀河映像，製作一系列具個人風格電影包括《暗花》、《真心英雄》等
‧2000年憑電影《鎗火》首奪香港電影金像獎最佳導演，其後憑《PTU》及《黑社會》再次奪得此項殊榮
徐克
‧1950年出生於越南，1966年移居香港
曾在美國修讀電影課程
‧1977年在無綫擔任編導
‧1979年執導首部作品《蝶變》，嶄露頭角
‧1981年憑《鬼馬智多星》奪得台灣金馬獎最佳導演
‧1992年憑《黃飛鴻》奪得香港電影金像獎最佳導演
林嶺東
‧1955年生於香港
‧1976年擔任無綫編導
‧1983年拍攝首部電影《陰陽錯》
‧1988年憑電影《龍虎風雲》奪得香港電影金像獎最佳導演
資料來源：《蘋果》資料室
