大本營喺新加坡嘅星展集團，前幾日公佈第三季業績，除咗一眾港區話事人喺發佈會上主持大局，身在新加坡嘅集團副主席戴國良都透過視像會議，同傳媒見吓面，回答大家提問。
記招未正式開始，個視像會議畫面已經見到喺新加坡嘅戴國良坐定定，反觀代表港區嘅三位高層，連人影都未見，現場只得三張「空」凳同三個咪！新加坡同香港冇時差㗎，咁究竟係戴副主席心急得滯？抑或港區高層嘆慢板呢？
話明兩地同步舉行記招，香港未ready，戴副主席惟有焗等，一支公對住兩地大班記者，又唔講得業績，你眼望我眼噏幾句講咗等於無講嘅說話撐場，過咗分零兩分鐘，港區高層見戴國良已經現身，嗱嗱聲埋位開咪，記招順利開波。