上個禮拜，港股終於企穩三萬點，散戶如華華第一時間諗起，香港股神李四叔講過，「三萬點考慮減持」，咁今日個市咪跌囉！咁堪輿學家楊天命嘅預言咪中囉！咁……就喺華華六神無主嘅時候，中外兩大股神──李四叔同畢菲特一人講一句，一個醒條無敵7串1大陸股組合過你；一個就話大陸太貴，不如去轉南韓掃貨團。華華只係一介散戶，面對兩個股神，信得邊個？
畢菲特嫌大陸貴去韓國
比李四叔更早做「股神」嘅畢菲特，上星期嚟亞洲行咗轉，接受中央電視台訪問時話：「中國股市過去兩年已經升咗5倍，𠵱家已經過熱，而且股票估值已經充份反映，現階段應該特別謹慎。」佢仲話，買股票係搵價值被低估嘅公司，不過喺中國，已經唔似兩年前咁容易搵到被低估嘅股票。
呢番言論，同睇好大陸嘅李四叔，分別好大，講到揀股，兩位中外股神亦好唔同，嗰一邊廂，四叔心水7隻愛股，當中包括中石油同國壽，至於畢股神，一早就沽清中石油，同時喺訪問當中又否認將投資國壽H股，仲講到明國壽不在投資選擇之列。
嗱，畢股神始終唔係中國人，可能佢都知自己未必好掌握中國國情，所以雖然對大陸股市前景有啲戒心，但都補番句：「唔知中國股市會唔會再升。」不過，畢股神嘅話到明大陸股估值過高，所以佢老人家之後飛咗去韓國，話韓股係亞洲最平股市之一，認為韓股未來10年表現會更好。
穩陣為上股神唔賺盡
股神畢菲特「飲譽」股壇嘅，就係佢以價值投資法揀股，不過都偶有失手，佢老人家上星期都講到明話好後悔咁早沽晒中石油。雖然賣晒中石油為佢進脹271億港銀，7年獲利達8倍，但由7月12日開始沽貨起計，中石油股價唔跌反升，至今累升近五成五。
不過，賺少咗係咪代表跌眼鏡就好難講，華華記得，當年科網股熱，畢股神不屑參與，結果科網股泡沫話爆就爆。所以華華幾時都話，賺少咗還賺少咗，穩陣最重要，佢嘅旗艦巴郡，業績理想，今年第二季盈利按年升33%，至31億美金，家陣每股巴郡A股升到12.75萬美金，差唔多成百萬港銀，即使以7月中沽售中石油開始計算，股價累積仍升15%，反映仲有唔少人「信奉」畢股神。
羅杰斯叫個女長揸中資股
中外兩個股神對大陸股市前景有唔同意見，不過，以點數計，李四叔似乎稍勝，華華呢個結論，唔係計身家或者計股價升幅，只係計撐場人嘅份量。雖然李四叔嘅股神名銜暫時仲有區域性限制，但今次唱好祖國就唔只佢一個人，仲有「商品大王」羅杰斯和唱。
早排羅杰斯接受英國《每日電訊報》訪問，講到明睇好中國股市，「出年1月上海股市要突破9000點冇難度，3個月後，仲會再升多六成，所以同個女都繼續揸住中國股票。」
羅杰斯同四叔一樣都係中國大好友，佢仲睇人民幣未來10年會升4倍，所以家陣開始賣緊美元資產。
mailto:[email protected]
