數碼達人：<br>蘋果作動　X時光機誕生

數碼達人：
蘋果作動　X時光機誕生

上星期有上到蘋果網站，大家都會留意它正在進行倒數，想當然必定再有新產品推出。不過今次比較特別係無論香港定美國，發佈時間都係下午6點，所以於香港舉行的發佈會，比美國仲要早！而今次主角就係Mac機中心MacOSX，新版叫Leopard，將會加入300項新功能，Mac友一定有排玩！

記者：許福合　攝影：伍慶泉

繼續玩盡CoverFlow

比起上個版本Tiger，今次新版Leopard無論內外都有唔少改變，蘋果方面就特別提到Leopard會係完整Unix為基礎嘅作業系統，穩定性相信會再進一步提高！另外因應唔少用家桌面亂成一團，要協助玩家更好管理桌面，Leopard會自動將從網頁、電郵下載而來的檔案都放入「下載」庫，用家只要從Dock就可輕易檢視到檔案內容，方便進行管理。
常用Finder亦加入好多新功能，不過最搶鏡當然係大玩CoverFlow，呢個功能由iPhone開始，甚受用家歡迎。而Leopard內的CoverFlow就更進一步，基本上支援任何檔案，並且唔係睇Logo咁簡單，而係即時可預覽文件、影音檔內容，Cool爆！

■Leopard能安裝在G5或G4上。

TimeMachine時光倒流

比起電腦壞了才想到要替電腦備份，Leopard就內置易用備份功能TimeMachine，用家啓動後，只要定期接駁外置硬碟備份，就能夠於電腦資料損失時還原檔案。示範期間所見介面設計非常特別，可以見到前後出現多個視窗，代表過去唔同時間，可以透過拉後時間找尋過去未遺失前檔案，找到之後就可以還原，毋須重開電腦，非常簡單。
此外，Leopard新功能之一QuickLook，於TimeMachine內亦可使用，能夠迅速預覽檔案內容，其支援檔案亦相當廣泛，由Office檔、PDF、文字檔到多媒體檔案都無問題。

■BootCamp能讓用家輕鬆於Mac上安裝《Windows》。

iChat好玩過癮

覽器會使用《Safari》，相信唔少人都試過速度有幾咁高，而配搭Mail亦經過改良，加入ToDo及Notes嘅使用。不過呢啲通通唔及iChat予人驚喜，當進行視像通訊時，可以即時將影片、音樂、文件檔案傳送予對方欣賞，就好似簡佈會一樣，效果極佳。另外，有時背景覺得單調，更可以將背景換成相片或影片，示範時就由巴黎鐵塔去到遊樂場，真係隨時呃到人㗎！如果你同時開啓太多軟件覺得亂，可使用新功能Spaces作管理，最多可以設立16組虛擬桌面，每個桌面都可獨立使用，切換亦方便。
如果你係剛從《Windows》跳槽嘅新Mac友，BootCamp亦用得着，可以讓用家輕鬆安裝《Windows》，並提供晒所需驅動程式，Mac上行《Windows》亦可以好簡單。