美股又來玩「反智」遊戲。上周三道指本來跌「兩嚿」（200點），怎料食完晏無耐，便傳聯儲局減貼現率，市況逆轉，無論冚倉或入市盤紛紛湧至，收市跌不足1點。奇怪的是，居然大把人信！
周四早段曾經跌過百點，竟然又有「大喇叭」吹話Fomc或於本周會議減足半厘，收市又僅微軟。
周五仲黐線，全美最大按揭機構Countrywide發表第3季業績，錄得25年首次虧損高達12億美元，ThomsonFinancial估計每股蝕1.25美元，結果彈出個比預期蝕多過1倍即2.56美元之惡劣數字。按常理，股價應插水才是，可是其總裁一句：「第4季可望每股有25至75美仙盈利。」此乃預測並非承諾，全世界竟當成是鴻鵠將至，Countrywide股價即日升32%，「帶動」道指升134點收市。
咁都得？稍為有理性的股民又怎不被弄至神經錯亂？更遑論差點將所讀過的書本擲落鹹水海的分析員！
恒指由8月17日最低19387點，短短時間喪升近六成，邊個話佢係「金融中心」？其間「有心人」無所不用其極，甚麼「港股直通車」迎合港府入市買港交所（388）、連AH股互換以至港交所和上交所合作都出埋，無非想引君入甕。
最近仲誇張，傳有人狙擊港元，要港元脫鈎兼升值，從而大撈一筆。狙擊，誰個狙擊？一兩億美元連支水槍都不如，這叫狙擊？意欲何為？