上個禮拜，敏妮話係時候買樓，坐言起行，敏妮自己唔得閒都搵媽咪出手，叫佢先聯絡相熟地產代理打探行情，再親身去九龍站走咗轉。
敏妮媽咪睇完一輪，發現九龍站上蓋物業樓價升得好急，見勢色唔對，佢轉而踩去新盤浪澄灣。
一睇即掃又嚟啦
敏妮媽咪轉睇浪澄灣，原因係新盤付款計劃彈性大，就以呢個盤為例，如果揀半年成交期，只係需要畀一成首期。又可以揀1年後先成交，雖然要照價加5%，首期15%，但就有長啲時間走盞。
據媽咪所講，「個代理呢頭話A室可以望到海景，呎價都未講，轉頭已經話賣咗，叫我睇C室同D室。又話要落決定就快啲，發展商星期一封盤，再開番起碼加一、兩成。」發展商提供咁有彈性嘅付款計劃，都係方便炒家。
敏妮都相信，嚟緊會輪到樓市旺，淨係見一班「樓市資深投資者」近排經常見報，都感受得到。不過，做任何投資之前，都要為自己準備一道逃生門，尤其係買樓。
敏妮炒股唔做孖展，量力而為；但買樓嘞喎，敏妮需要借按揭，講緊嘅槓桿效應，賺嘅時候係好好味，但輸嘅時候亦好甘。仲有一樣，係要知道自己買乜，所以敏妮星期六晚，都去咗九龍站新開商場Elements走咗轉。
計好至買免坐艇
從商場格局睇，嗰度好有本錢做九龍IFC，以location嚟講，應該都算穩陣，下一步就要計掂條數。
97年樓市火紅嘅時期，唔少人都有一個諗法，就係驚再唔買就冇機會，所以唔理自己能力，「入咗市先諗」，結果不惜債台高築，但一個浪冚埋嚟嘅時候就沒頂，所以敏妮都係計清楚自己有冇能力坐艇，先再扑槌。
http://manlitalk.com/blogs/