法國食品集團達能（Danone）一直諗住強攻大陸市場，先後入股娃哈哈、樂百氏、滙源（1886）、蒙牛（2319）、光明乳業等。不過大多分手收場：娃哈哈同達能因品牌問題提出訴訟，最後不歡而散；因為入唔到光明董事局，達能今個月將20.05%股權賣晒畀上實（363）。
之不過咁，凡事總有例外，滙源戰略發展副總裁毛天賜話，達能同滙源關係不知幾好，達能不但係持股21.3%嘅策略股東，仲喺員工培訓、產品研發等15個項目有合作交流，雙方關係好到要用北京俚語「鐵哥們」嚟形容，即係等於廣東話嘅「死黨、好兄弟」。
唔好睇毛天賜個名咁中國，查實佢係一個早已喺北京開枝散葉嘅美國人，講普通話流利過不知幾多香港人原來毛總曾經係Danone(HealthMineralWater)總經理同埋Danone(HomeandDelivery)總經理，因為同滙源主席朱新禮啱傾、精通中英文兼擅於戰略，舊年9月就過檔滙源。