港島區啲樓越嚟越貴，無他嘅，土地供應少，尤其係臨海地，好似東區龍頭屋苑鰂魚涌太古城咁，咪睇佢最年輕都有成20年樓齡，保值力絕對拍得上豪宅，唔少單位呎價已升番去97高峯期。
近年呢區賣嘅新盤，唔係豪宅就係單幢樓，有番咁上下規模嘅，相信大家都噏得出；現時賣緊嘅貨尾，有規模嘅唔多，想成為港島區業主，可以諗吓西灣河嘉亨灣同灣仔尚翹峰，座落市中心，又近地鐵站，平時出街wet完，返屋企都方便啲。
其中嘉亨灣個會所，設施更堪稱同區最豪。呢兩個盤賣咗咁耐，就知發展商幾咁惜售，優惠仲有減無加㖭噃。
去西灣河同灣仔睇完樓，近近哋不妨落銅鑼灣時代廣場行吓，嗰度搞咗幾個同「哈佬喂」有關嘅活動，到時會有一位幽魂俠士，帶領住靈馬喺露天廣場現身，嚇你一驚。同場亦展出多幅搞鬼畫作。
或者去MegaBox睇瑞士『Pingu小企鵝』，同MegaIce總教練VincentChu及嘩鬼冰團一起示範花式溜冰。