講到冧客，大行財雄勢大，點都着數啲。好似滙豐咁，早排先至包起成間海運戲院，請工商客睇《兄弟》，前幾日再升一級，包咗四叔間四季酒店，做東請食晚餐。今勻到場招呼貴客嘅，輪到港區一姐梁高美懿。
招呼「貴」客就梗唔可以用普通菜式，華華八到，當晚有新西蘭帶子、挪威三文魚、日本長腳蟹、山形縣和牛、比利時士多啤梨配玫瑰香檳雪糕，呢啲菜式指定由行政總廚BretPatterson操刀，食到班客嘴舔舔。
其實，銀行唔係淨識招呼工商客，好似華華有個auntie係星展嘅尊貴客戶，前排就收到請柬，邀請佢去四季食Dinner，聽講話，星展都係以包場形式，場面好熱鬧，佢老人家都唔知幾冧！