一拖（038）本業靚仔唔在講，揸住交行（3328），帶嚟5倍回報，一拖肥仔水。一拖07年半年度（6月底止）純利狂飆咗近3倍到1.2億銀（人仔．下同），主打農業機械業，溢利繼續穩步上升，新加入嘅柴油發動機及燃油噴射器項目，亦已經為一拖帶嚟上4900萬銀溢利，成為第二大業務貢獻板塊。一拖既係扶農國策股，集團又有龍頭優勢，農業機械業已經坐定粒六。加埋喺業務壯大下，若果獲注入柴油機呢類搵真銀業務，未來業績仲爆炸。
又一拖家陣揸咗交行800萬股，成本價1.96元，交行呢期一支箭升到上12.88元，為一拖帶嚟近9000萬銀利潤。投資成績一樣靚仔，一拖業績錦上添花。好保守計數，一拖07年度純利2.4億銀，PE都係15倍，國企股狂牛，一拖呢個PE水位夠晒吸引。以一拖20倍PE做目標，要升30%到6.16元。
中富就快嚟料
中富（1191）易主兼變身非常渴市嘅環保股，買中富，買於股價微時。中富呢期易手，投資者之一就係「金勞詹」，詹生成本價每股0.5元，中富現價0.385元，仲係潛緊水。又計埋中富增購環保項目廣州金田餘下60%之後，NAV約莫0.45元，P/B仲喺1倍樓下，環保股少有。隨住集團完成改名「粵首環保」，應該嚟料，呢轉先睇詹生上車價0.5元。 錢雋