那位名人或藝人最適合做萬聖節代言人
採訪、攝影：胡比、蔡如玉、王崇穎
裕美：撐Steven扮狒狒
「我覺得SunBoy'z嘅張致恆（Steven）都幾適合做萬聖節代言人㗎，因為佢好鍾意扮鬼扮馬，又成日扮聲，好似扮唐老鴨叫，如果大家見過佢扮狒狒，就知有幾似，再化一啲恐怖妝，就十足十隻鬼狒狒，實嚇死人。」
鄭融：最怕彭氏兄弟
「我覺得彭氏兄弟可以做萬聖節代言人，佢兩個拍咁多鬼片，又拍得咁出色，搞到𠵱家講到鬼就諗起佢哋，如果萬聖節見佢哋嚟拍門，我仲驚佢哋有冇帶埋啲鬼嚟呀，哈哈！一定會畀糖佢哋，等佢哋快啲走人。」
周柏豪：搵羅蘭搞氣氛
「我會揀羅蘭姐，因為佢成日喺電影同電視劇入面扮鬼、龍婆同埋扮問米婆，佢演技好好，真係扮得好似，我次次睇完都好驚，尤其一到夜晚諗番起佢啲戲，直情會瞓唔着覺，如果佢做萬聖節代言人，我諗會好有氣氛㗎。」
關楚耀：軒仔眼圈夠黑
「我嘅首選當然係張敬軒啦，我真係覺得佢係最似嘅萬聖節代言人，就算唔使化妝都好似，因為佢有兩個好大嘅黑眼圈，之前都試過同佢做萬聖節嘅活動，佢化咗妝着埋斗篷簡直入形入格，特別係佢對黑眼圈，真係俾佢嚇親。」
