噚日唔少股仔炒咗半日就由高位回落，理由唔係個市唔好，反而係個市太好，尤其傳統藍籌太強，吸引資金炒藍籌輪。不過個別股仔仍然炒得火熱，噚日最威水係宣佈斥資百億元收購阿根廷油田嘅新時代集團（166），股價復牌急升95%，成交額有2.22億銀，唔係亁炒牛河。
斥資百億收購油田
能源有價，股仔轉型最實際係搞能源項目，買油採煤，掘出嚟即時可以賣錢。不過中國油田開採早由3大石油公司壟斷，未輪到本地細公司沾手。至於海外油田，經典例子係某三四線股買馬達加斯加油田。
石油業亦吸引到證券股高信（007）去投資，去年8月增持埃及油田至兩成後，9月獲埃及政府授予油田的整個石油開發及生產權，到11月又宣佈收購澳洲上市的油氣公司Volant全數權益，由於Volant在該埃及油田持有兩成權益，高信變相增持埃及油田至四成。另外，Volant正參與公開競投或收購位於也門、哥倫比亞、蘇丹、阿爾及利亞和美國等地多個石油項目，高信若成功轉型做石油企業，會有好多公司跟風。
賣方以溢價收股票
至於新時代是次收購規模達百億元，的確唔講得笑，不過卻毋須畀現金收購。收購代價4.08%以新股、93.62%以可換股票據及2.3%用承兌票據抵付，兌換價為1.50元，較停牌前溢價54.64%，若票據全數兌換，賣方於新時代持股量將增至90.72%。賣方肯以溢價收股票，反映對日後股價表現有一定信心。有關阿根廷兩項油田的詳細儲量及附近管道、煉油廠等設施，通告講得好詳細，有興趣嘅投資者應該睇睇份通告。