惡佬明睇「靚男難求」（本欄十月二十三日），對左丁山講：「時下青年穿着如此，私人大公司或者可以執着一啲，但公家機構嘅衣着似乎無人理會。我哋到醫院睇病，見到一啲着波鞋牛仔褲嘅青年男女，一穿上件白袍，就變成係醫生，為我哋睇病，起初有心理抗拒，甚至懷疑呢啲醫生是否可靠，久而久之都慣咗啦，點似得你哋去中建大廈十六樓見到嗰批醫生吖。」
跟住惡佬明叫左丁山睇十月二十二日嘅《老五馬經》，有一篇「皇后戲院結業，在心齋主懷舊」，講述四十年代香港光復不久之後，約六十年前在中環睇戲之情況。「在心齋主」話一九四五年八月三十一日之後，皇后戲院二樓超等戲票票價係三元五角，已值普羅市民幾日之茶煙飯，故此係外籍人士及高等華人專利，而進場睇戲之外籍男士穿上踢死兔黑色禮服，打煲呔，女伴穿拖地長裙禮服，插手男士臂彎，雙雙踏上紅地氈拾級登上二樓超等，普通觀眾就在旁睇完人先至入場睇戲。
今時今日，香港幾時會有人穿上禮服先至入戲院呀。喺文化中心聽外國著名交響樂團演奏，左丁山會穿西裝，曾見過外籍人士穿上禮服，但在不少觀眾穿T恤波鞋人群之中，又似乎好滑稽！叫秘書V睇老人家「在心齋主」之皇后戲院個人回憶，秘書V話似睇天方夜譚，因為除咗睇超等着禮服之外，佢話：「三個半就可以買幾日嘅茶煙飯？真唔真呀？𠵱家三個半銀錢喺中環可以買到乜？」一張《老五馬經》都買唔到！
講咁耐嘅回憶，顯示自己年紀老，香港好似「在心齋主」呢類對戰後初期有清晰記憶之人，唔會有好多個。好似最近人人講《色，戒》（左丁山仲未睇過），有人講及五、六十年代《春秋雜誌》連載金雄白之《汪政權的開場與收場》，左丁山想搵嚟睇吓，人人都話已經絕版，唔知去邊度搵。抗戰時期之一段歷史，神秘莫測，共產黨、國民黨所掌握之歷史檔案紀錄，特別係關於汪偽政權嘅，唔知開放咗未呢？好似冇學者研究過，如有當時住在上海嘅「在心齋主」人物講吓回憶，相信好有參考作用。