自問近期貼士水準唔差，擂台比賽正與青蛙仔兄為10月榜首位埋身肉搏，可惜近4周每逢來到〈蘋果開倉〉版皆中伏，惟有喺各地聯賽謀求新出路，轉轉運氣。今次捨英冠，重心推介轉向日、荷，捧大阪飛腳上盤加「大」串海倫芬鋼W。
曹宰榛極勇利「大」
賭波都要講緣份，贏開有感情，冇理由買對家；故今次重心推介皆為筆者上周贏過錢嘅球隊。日聯尚餘5周，一直相信大阪飛腳仲有機會喺最後階段，與兼顧兩邊戰線嘅紅鑽拗手瓜，實情是兩隊只差6分而已。
呢場波「入球大細」開2.5球，1.68倍「大」有一博空間，主場嘅心跳一對箭頭「弗」爆，飛腳嘅火力則係日聯最強。幾近無機爭霸嘅心跳近況唔算好，但喺前線合作攻堅嘅曹宰榛同矢島卓郎「弗」到漏，前者前仗連中三元幫球隊贏八鯨3:0，而後者亦喺上仗對水手省入兩粒，幫隊波贏2:0。
至於飛腳，上場佢哋大炒甲府風林5:0後，今季聯賽入到去64球，比榜首紅鑽多成10球。我聽攻開日聯嘅青蛙仔講，因左大腿肌肉撕裂而缺席咗3場賽嘅巴爾，經已復操，如夠狀態上陣，再加埋播戶龍二、麥諾艾維斯同埋遠藤保仁，點可能喺心跳身上攞唔到入球？為爭霸戰意如虹，上盤加入球「大」屬全日信心之選。佢哋嘅7.5倍奪標賠率亦可一博。
博海倫芬狂炒芬洛
荷甲，捧近兩周為小弟進賬唔少嘅海倫芬，出番「入球機器」巴西國腳艾方素，該隊根本係前列分子，今次作客到包尾、遇上中型班洛達主場仍要輸3:5嘅「升班馬」芬洛，1.5倍客W唔算冇肉食，博多注波膽「客其他」。另外，唔怕搭沉愛隊阿仙奴隻船，捧佢哋作客利物浦開下盤，若見後者臨場仍用唔穩嘅希比亞拍加歷查扼守中路，可冒進轉博客勝。
近5場往績：輸輸輸輸贏
蘋果波神
股市大旺，英超盛世，大家齊來贏多啲！