【第五回】入行35年的許紹雄（Benz雄）能文能武，亦正亦邪，演出的角色多如天上繁星。近日他在劇集《奸人堅》中與黃子華合作，演出牙擦蘇一角，Benz雄笑言角色有別於過往電影電視中行先死先的阿蘇，誓要打破俾人搵笨多過食飯的定律。新版本的阿蘇不單止醒，還要奸過「奸人堅」，實行替牙擦蘇大平反。
牙擦蘇這角色在粵語片《黃飛鴻》系列中，由西瓜刨以一棚哨牙演得街知巷聞，令阿蘇等同哨牙的形象深入民心。早年徐克拍攝《黃飛鴻》電影系列中，則起用張學友做牙擦蘇，稍為此角平反。但去到許詔雄這新一代牙擦蘇，既不英俊又不哨牙，到底要如何發揮？Benz雄說：「扮豬食老虎囉，呢個角色都唔蠢，話晒未跟黃飛鴻之前係做賊，直情蠱惑過奸人堅，黃子華都俾佢奸到認埋牙擦蘇做契爺，一齊去尋寶。」
Benz雄表示收到劇本之初，已知故事另類，主線圍繞黃子華扮演的奸人堅發展，他說：「一睇就清楚連梁寬、豬肉榮呢啲咁重要嘅角色都冇，主線唔係講打係講笑囉，留番阿蘇都係想要番個喜劇效果啫。」
腦震盪度橋爆肚
但連黃子華接受訪問時，都笑言怕奸人堅太奸會令師奶掟他雞蛋，比奸人更奸的阿蘇又會否擔心？Benz雄信心十足地說：「我都係奸過奸人啫，唔驚，班師奶應該獎我食雞蛋至真。」
Benz雄在劇中與子華的對手戲漸重，他透露二人會在對稿期間度橋爆肚，務必令觀眾捧腹大笑，他說：「子華好多時都會諗啲古靈精怪嘢出嚟，加吓現代術語咁就已經好抵死，當然你要識接，好多時事前已經傾好咗。」
入行35年，明年已是Benz雄在無綫的第30個年頭，有資格拿一面俗稱老人牌的紀念金牌，他說：「之前20年先攞咗條金鏈，轉眼又10年。其實當初入行同我個人一樣咁符碌，符符碌碌又35年。坦白講我做人係有啲運，比上不足比下有餘，人哋話環境唔好時我係咁，人哋話好景時我又係咁。」
參觀無綫變明星
自言靚仔沒他份、才能又不夠出眾的Benz雄，當初交5元報名費投考71年第一期藝人訓練班的目的，原來只為參觀當時位於廣播道的無綫錄影廠，他回憶說：「嗰陣唔係咁輕易畀你入去㗎，雖然嗰時5蚊都唔少，搭的士起錶都係1蚊、兩蚊有找一碟碟頭飯，我見冇乜嘢做咪去睇下囉，估唔到佢又會收咗我，到𠵱家都唔知點解。」
之後Benz雄便半工半讀，白天為父親打工，晚上則像返夜校般到廣播道上課，他說：「嗰時嘅導師有劉芳剛、鍾景輝KingSir同陳有后，都幾嚴㗎，1年課程有3次考試，每次都會踢一班人走，剩低嘅就簽約做藝人，同期嘅有米雪、李修賢同林建明。」
問Benz雄到底如何過關斬將捱到畢業可以留低，他半開玩笑說：「可能就係因為我睇起嚟無用，應咗莊子講嘅『無用之用』囉。」這個牙擦蘇說到這裏，更拋起書包來，說：「莊子話啲人見到棵榕樹，覺得佢嘅木唔夠硬無用，所以無理到，見到側邊棵櫸樹啱啱夠硬，就劈咗嚟做傢俬。之後發現棵榕樹原來會生啲氣根，可以畀人乘凉，反而係最有用。」
棄平治揸日本車
Benz雄自言因性格問題，喜歡過安穩的生活，遊戲人間，也學曉隨遇而安。過去曾跟他合作的對手，不少已貴為影帝影后，單是一套電視劇《新紮師兄》，便跟梁朝偉、劉青雲和張曼玉做過對手戲，他在劇中演的舅父東一角，口頭禪「大隻講」也流傳至今時今日，近年他也經常在杜琪峯的作品中演出，這35年的演藝生涯，並沒有白過。
提到Benz雄這稱謂的由來，始於當年他是少數開平治房車的藝人，不過近年他已改揸日本車，Benz雄說：「我第一架Benz買時8萬，過咗幾年賣出去又係8萬，𠵱家新車落地已經唔見一半，條數唔係咁計。」這個阿蘇果然面懵心精，奸人堅都望塵莫及。
採訪：何永寧 攝影：陳俊強
哨牙小八卦：認住佢棚牙
「牙擦蘇」平日牙牙擦擦、欺善怕惡，綠葉王許紹雄當然能把這角色發揮得淋漓盡致。其實過去也有不少明星扮過牙擦蘇，當中最為人熟識的，當然是粵語片年代《黃飛鴻》系列電影中的西瓜刨（圖），他的哨牙更成為牙擦蘇的特徵。
其後徐克於91年開拍電影《黃飛鴻》，則找來張學友扮牙擦蘇；吳孟達則在電影《黃飛鴻笑傳》扮過牙擦蘇，黃飛鴻由譚詠麟飾演；陳國邦在電影《黃飛鴻之西域雄獅》中扮演的牙擦蘇，更精通英語。此外，張衞健92年曾主演無綫劇集《我愛牙擦蘇》，牙擦蘇破天荒成為男主角。
