因為喺《溏心風暴》做細契而人氣急升嘅關菊英，大前晚俾本報影到同一位雌雄莫辨嘅西裝友WillyChow一齊喺灣仔福臨門食飯，送走晒友人之後，Willy送關菊英返太古城嘅寓所，仲喺佢屋企逗留咗成個鐘頭先至走。
女伴眉清目秀
事後關菊英接受本報訪問，話對方「係男係女都冇所謂」，至於有冇機會發展，佢就話同得佢食飯嘅，個個都係好朋友。細契講嘅嘢令到佢同呢位Willy嘅關係更加撲朔迷離，馮仁昭同啲上流社會嘅老友八過，呢位眉清目秀嘅Willy，原來係女兒身，不過向來鍾意作男性打扮，佢嘅來頭唔小，係本港知名企業家南聯實業有限公司主席、有「公仔麵大王」之稱嘅周文軒姪女，家底豐厚，Willy以前同陳寶珠好老友，成日出雙入對，但近年兩人就少咗聯絡。
聽講Willy開咗間從事裝修工程嘅公司，搞得有聲有色，私人感情方面，佢呢排同細契行得好密吓。
另外噚日有讀者報料，話見到細契同Willy朝早8點幾齊齊搭飛機去東京，馮仁昭打電話搵關菊英求證，佢嘅手機駁咗去留言信箱，所以搵唔到佢。
