林熙蕾在港影壇發展八年，更成為杜琪峯的愛將，不過最近她卻因檔期問題成為阿杜與經理人之間的磨心，林熙蕾坦承阿杜這位恩師令人望而生畏，又指他待人處事以至對個人儀容都極度嚴謹。提到愛情觀，林熙蕾最近與朱孝天打得火熱，問到此君會否是結婚對象時，她思索了一會答：「唔知道！」但她自言已學懂如何面對生命中的高低起跌。
在美國加州大學主修經濟與文學的林熙蕾，自01年客串杜琪峯的《全職殺手》後，即成為阿杜的愛將，不過今年初卻發生一段小插曲，差點令她與這位大導演鬧翻。事緣電影《文雀》拍攝時間拖了三年，經理人公司未能騰出檔期讓她繼續演出這部新片，令導演十分生氣。夾在經理人與亦師亦友的阿杜中間，真是左右做人難。
大師器重獲益良多
林熙蕾日前接受訪問時說：「好多人話杜導演好惡，第一次同佢拍《全職殺手》，我都好驚佢，但合作多咗之後，其實佢係好好人，而且好注重儀容，搭飛機都會着晒恤衫同西褲，日日開工都係着唔同衫、唔同鞋嚟，我諗佢啲衫仲多過我呀！其實導演好講得笑，不過開工時佢鬧一個演員，好多時係因為想佢好啫！如果杜導演唔係要求咁認真，點會拍到咁多好作品出嚟！之前啲誤會已經成為過去，我咁多次同佢合作真係獲益唔少，係佢令我演戲開竅！」
阿杜、林嶺東及徐克以接龍形式拍攝的《鐵三角》中，林熙蕾再次獲欽點出任女主角，對此她說：「今次演出需要時間去調節，因為呢部戲係冇劇本嘅，喺第一部份，徐克話畀我聽，我係做一個好驚俾老公害嘅女人，所以要搵做警察嘅林家棟嚟保護，仲同家棟搞婚外情；到林嶺東拍第二部份時，劇情又峯迴路轉；到杜導演處理第三部份時，又係一個新天新地，但三部份串埋一齊後係點，其實我仲未睇過。」
32歲的林熙蕾一直與父母在美國生活，大學畢業後回到家鄉台灣當模特兒，至99年被中國星老闆向華強太太陳嵐賞識，首部電影便是與天王劉德華合演《賭俠拉斯維加斯》，其迷人的身材與銷魂的眼神讓男人砰然心動，難怪兩年前她與朱孝天合作演出《東京審判》時，對方也為卿狂。
盼盡快出嫁生BB
雖然兩口子熱戀已有一段時間，但這段地下情一直未被傳媒發現，直至早前有周刊拍得兩人共賦同居的照片，戀情才正式曝光，林熙蕾說：「我想再三強調，朱孝天係我其中一個好朋友啫！我哋會相約去食飯睇戲，將來仍然會繼續，唔會受任何人影響，俾傳媒影到我喺佢屋企出入又點樣，我唔會理，亦唔打算回應任何嘢！」
林熙蕾希望有自己的家庭和孩子，但她強調不會刻意公開感情生活，縱使結婚也不打算向外交代，不知道朱孝天是否她的真命天子呢？林熙蕾說：「我冇去諗過自己嘅擇偶條件，因為往往諗同現實都唔相同，至於朱孝天同我可以發展成點，我真係唔知道，一切睇緣份啦！屋企人係有催過我結婚，而我都好想搵到個自己喜歡嘅人嚟嫁，咁就可以快啲生BB。」
初到香港情緒低落
林熙蕾當初來港演戲時坦言不是太專心，情緒低落時連工也不想開，她說：「可能我性格比較內向，平時都唔係咁多嘢講，所以性格比較多愁善感，加上一個人初嚟到香港，又冇朋友，唔開工就屈喺屋企諗東諗西，好容易就會喊出嚟，但三年前突然間有一朝，我瞓醒之後，好似乜都諗通晒咁，明白到開心同唔開心都要生活落去，點解唔開心啲！」
撰文：陳月媚 攝影：陳慧安
