滙豐個報告話多咗年輕人入市，而且「陰盛陽衰」，令華華諗起今年冒起嘅「中大少女股神」王雅媛（Victoria）。佢因為參加模擬炒股比賽攞冠軍而揚名，好多人質疑話佢只係紙上談兵，不過，華華同佢傾過偈，其實，佢都有真金白銀拎嚟炒股㗎，而且成績仲好理想㖭！
Victoria同華華講，今年整體股票組合升咗1倍，未來特別睇好中國機械股同水泥股。佢持有嘅交大科技（300）同台泥國際（1136），今年就分別為佢進賬1倍同4倍，毋負「中大女股神」之名。
佢仲同華華講咗兩個買股心得。首先要睇公司盈利，盈利增長有冇超出市場預期；第二，當然要留意公司未來前景，有冇受惠內地推行嘅政策，會揼幾多錢發展業務，始終基本因素最實際。
不過，Victoria話，見家陣個市升到咁高都有啲驚，好多股票估值太高，所以投資時會好小心，暫時都唔諗住入市，等調整先再入，至於手頭上揸住嘅股票就keep住唔放。佢仲提醒後生仔炒股，要抱住學習嘅心態，千祈咪諗住一定賺。