向有「綠葉王」之稱的黎耀祥，演技毋庸置疑，但每年無綫台慶雖有提名，最終都是戥人高興，跟他與無綫沒經理人合約有着密切關係。祥仔直言早已看透遊戲規則，不但沒氣餒，還體諒無綫捧自己友發展業務方針，力撐公司做法絕對正確。
黎耀祥憑劇集《舞動全城》演出，在無綫下月17日舉行的《萬千星輝頒獎禮2007》中獲得最佳男主角和我最喜愛的電視男主角兩個提名，祥仔雖獲網友大撐演技出色，但一直與獎項無緣，十分可惜，猶幸他為人低調，也很清楚自己的定位，故並不特別熱衷名份。
「公司偏心係啱」
環顧兩獎提名名單，祥仔說：「最佳男主角獎，在公在私、主觀客觀，非陳豪莫屬，佢喺《溏心風暴》主演嘅『得得地』做得好好，不過我又好鍾意佢喺《通天幹探》裏面扮鴨，佢嘅演技好有突破。但係我最喜愛的電視男主角獎項就睇好《奸人堅》嘅黃子華，佢演得好有自己嘅風格。」
祥仔只是無綫合約藝人，並非有經理人合約的親生仔，他早已了解公司的遊戲規則，也不看重得失，他說：「呢個遊戲並非由我去玩，係公司去玩，公司偏心係啱，呢個係佢宣傳策略，梗係畀自己友，唔通畀外人咩，公司捧紅自己旗下藝人，對公司業務好有利，外間人成日話TVB咁樣唔啱，我反而好撐佢呢個做法。」祥仔續說：「我嘅演技早已俾觀眾同外間認同，反而一啲新人、或者上緊位嘅小生花旦，比我更需要呢啲獎項，公司對佢哋錦上添花，好過對其他人雪中送炭。」
讚志雲世外高人
眾多獎項中，祥仔反而最恨奪得「飛躍進步男藝員」獎，他說：「我見啲名單都係新人，其實唔同年齡嘅藝人都有進步空間。」對於無綫總經理陳志雲曾被愛將鄧健泓形容是蜜糖，口才了得的祥仔卻不茍同，他說：「我覺得處事細緻嘅陳志雲點會係蜜糖，佢應該係世外高人先啱。」
採訪：比華利 攝影：葉君海
髮型：IvanLee（Headquarters）
