報紙娛樂版有條標題：XXX權傾YY，資深人力資源總監I看後不禁為之失笑，總監I話：「呢張報紙想話擦鞋，捧阿XX老總，其實係害佢。啲大老闆最唔高興外人話自己嘅馬仔甚麼權傾一時，權傾某某公司之類。喂，公司乜嘢權力都在大老闆手上，公司老總有任何權力，都來自大老闆授權，或者唔干預啫。老總咁出鋒頭喎，大老闆一下唔高興，或者公司業績稍為倒退，大老闆就會立即收權，將老總一腳踢出公司呀，乜嘢權傾一時吖嗱！」
打工仔千祈唔好以為大老闆德高望重，榮譽等身，地位家財高自己幾百皮，就以為大老闆唔會斤斤計較呀，你自己知道冇能力，冇大想頭到去威脅大老闆啫，但世界上永遠有功高震主呢回事，因住至好。古書有云：「趙孟能貴之，趙孟能賤之」。永遠記住，大老闆就係趙孟，「之」就係老總、CEO。打工仔最緊要一味埋頭工作，為老闆賺錢，保持低調，鋒頭與榮耀全歸於大老闆。
總監I飲完啖茶，又有嘢講：「剛才所云，與最高級打工仔有關。與新人搵工有關嘅，有不少笑話講畀你聽。我見到一啲時下青年男女，用好多我未聽過嘅英文名，好似𠵱家再冇人叫做Peter，Paul，Mary，John，Joe，Nancy嘅嘞，總之好有創意，西班牙、法國、俄羅斯名都有，我都唔識得晒。冇所謂啦，我哋已經out晒，唔好同年青人計較。但上星期見到報紙講及一位學歷唔錯嘅大學生，想話叫佢嚟見吓，但佢嘅英文名字竟然係Napoleon，我大笑一番就取消原意。」年青男女有知識到極，都唔好叫自己做「拿破崙」吖，去到歐美讀書，會俾人笑到面黃㗎。左丁山以前有位中學同學為自己取英文名，叫做Shakespicasso，當然係細路哥唔識世界，佢一去到美國讀書就立即改名，用番一個好普通嘅名，呢位同學好聰明，好識做，但有啲人就點極都唔明，惟有等佢哋去撞板。聽一位年青人講，佢識得一個朋友，為自己英文名取為Grammar，創意實在太勁，如果寫求職信碰釘子，反省吓啦。