林夕講健康政治正確（十月二十一日），係過來人肺腑之言。香港人好怕見精神科醫生，誠恐一見就自動透露自己曾有精神病而被人歧視。見過醫生而公開咗嘅，只得極少數，好似曾智華、張堅庭、林建明、林夕等。佢哋嘅病醫番好之後，公開宣揚，促請市民正確面對精神病，值得稱讚。
外國人睇心理醫生，好似我哋睇家庭醫生攞傷風咳藥水咁常見。紐西蘭欖球隊（AllBlacks）本係今屆欖球世界盃大熱門，球評家一致看好，球迷寄以厚望，點知在八強賽就輸咗畀東道主法國，舉國震驚，球員回國之後，心情不能平復，於是球隊安排心理醫生為每位球員做心理輔導，希望幫助球員早日恢復心理正常，不止在球場上恢復正常，亦在日常生活上恢復正常。心理輔導會唔會包括埋提供藥物，醫治個別球員嘅暫時抑鬱症呢，啲球員相信唔會拒絕啩？
體育比賽，看似普通不過，但一去到國際比賽層次，往往牽動國民情緒，好似南非咁，贏咗欖球世界盃冠軍，舉國歡欣若狂。但係「政治正確」嘅政客又試伸出干預之手，搞到南非欖球選手為前途焦慮。點解呢，原來南非政府話南非係黑人國家，欖球隊內有太多白人球員，不能反映南非社會現實及種族人數比例。點樣改正呀？以後南非欖球隊要選多啲黑人球員，以求種族比例平衡，即係黑人多過白人。本來欖球發源於白人國家，黑人國家要追上，需一段時日，但一旦發展之後，黑人球員就會逐漸憑自己實力，闖入國家隊。你睇吓足球就知啦，英格蘭、法國，有幾多黑人球員呀，成隊法國足球隊之內，白人直情係少數㖭，使乜政府下令增加黑人球員啫，打波要憑真正實力嘅噃。
政客之見，往往與別不同，只重政治正確，不求其他，要搵心理醫生輔導嘅，應該係啲政客。香港有啲評論員為咗撐特首嘅「文革乃極端民主論」，拼命引用法國大革命（特首最熟悉嘅一段歷史）之瘋狂狀況以證明特首並非失言，而係反對派應多讀歷史；左丁山睇完呢啲歪論，好想搵人輔導吓。