數碼達人：Non-Stop!<br>狂影40,000張唔使唞

數碼達人：Non-Stop!
狂影40,000張唔使唞

買相機其中一個會考慮到嘅係「用咩記憶卡」？出機嘅時候仲可能要按需要配多張記憶卡先夠用。不過自從SONY公佈Cyber-shotT2，用家就再無這個煩惱，T2係首部內置記憶體高達4GB嘅數碼相機，毋須加插記憶卡，就可以拍到4萬張（VGA）相片，影相到中途要換卡？已經Out啦！

記者：許福合　
攝影：陳盛臣

狂影毋須記憶卡

拎住部DC出街影相，仲要帶定後備記憶卡，你話幾唔方便呢！Cyber-shotT2突破咗一般DC着重記憶卡嘅設計，將內置記憶體提升到4GB，用家唔使用記憶卡，都可以任拍任影。4GB容量可供用家拍攝4萬張VGA（640×480）相片；即使追求質素，用最高嘅800萬像素，拍攝數量亦可達1,000張之多，唔用記憶卡都夠使！有咁多相，自然怕混亂，T2具備完善分類整理功能，可以根據拍攝日期、相簿名稱分類，要搜尋相片就更容易。另外亦可以自訂編排相片，隨時重溫。

■共提供有5種顏色機身，有黑、藍、綠、粉紅及白色選擇！

■最高解像度為810萬，另設有16:9模式。

Touch芒任你畫

雖然T2有成4GB容量，不過外形就絕對無變得大大嚿，仍然保持有一貫Cyber-shot的輕型賣點，而機身就有黑、藍、綠、粉紅及白色5種顏色任揀，採用蔡司Vario-Tessar鏡頭，有機蓋保護唔怕刮花。當反轉機背，可以見到按鈕數量好少，事關T2用上2.7吋輕觸式屏幕，主要設定及調校都只係用手指篤幾篤。比較特別的玩法有「自定」對焦，拍攝時可直接於屏幕上篤出心目中嘅對焦點，非常方便！另外，T2還內置有相片繪圖功能，可直接於相片上繪畫及寫字，更可加上多達30種圖案及符號以及15種相框，趣味性大大提高。

■主要設定都係經輕觸式屏幕完成。

■當點選相片，就會自動放大。

一笑即拍

最近數碼相片都要具備人臉對焦先叫夠級數，T2當然唔會缺少，而且仲加埋最新笑臉拍攝。當對焦範圍出現笑臉，T2就會自動進行拍攝，包保唔會錯過最靚嘅一刻，每張相都係笑着影！另外影相大忌就係手震，機身有光學防震系統外，ISO感光值仲提高到3200，可幫助用家拍出既穩定、又Sharp的相片。當拍完咁多靚相，記得要替相片加上Sharemark，標明相片用途，當T2接駁電腦後就會自動將相片上載。現時T2更支援Blogger及YouTube等較受歡迎嘅網站。