上周荷甲出現「反常」情況，9場波有6場開細，尤其阿積士被奈梅亨悶和0:0、飛燕諾僅勝精英隊1:0，好似我咁鐘意冷膽嘅球迷相信都「領嘢」，不過堅持「荷蘭波，入波多」呢個信念，今周再追呢兩隊波。
睇番上周精華，飛燕諾對精英隊入球機會其實唔少，不過遇着對家門將「上身」，又中柱中楣，先至贏一粒咁少；今次「飛仔」作客，換來更好賠率，對手川廸近期黑到痺，連續3仗冇波入，成績亦只得1和2負；相反「飛仔」今季防守穩陣番好多，聯賽8場竟然有6場冇失波。睇番上季川廸主場贏飛燕諾3:0，今次博「飛仔」有仇報仇，贏番佢3:0。
阿積士唞夠博翻冧
阿積士上仗連單W都畀唔到大家，真係好失望；好在佢哋已經喺歐協盃出局，有成個禮拜好好反省，亦畀一眾國腳休息；今次阿積士作客烏德勒支，奇怪地烏德勒支作客好過主場，烏軍主場竟然只得1和2負。既然阿積士上季已經贏過3:2，今次一於再追。
西甲方面，可博奧沙辛拿反底；奧軍上仗有門將列卡度停賽，先作客輸艾美利亞，今仗佢復出，相信後防穩陣番。華拉度列近況極差，主場都輸得畀畢爾包，呢場波外圍奧沙辛拿讓到半球，信心十足，一於取有7.5倍的西甲大熱波膽主勝2:1。
文：牽牛
貼士
波膽過關3串7
星期六60飛燕諾勝3:0（20倍）x
星期日3阿積士勝3:2（17倍）x
星期日34奧沙辛拿勝2:1（7.5倍）
全中3,212倍