第40屆東京車展昨日正式開鑼，雖然全球注目點仍是一堆將推出、如GT-R之類嘅極速辣跑，但今年嘅概念車實在太創新喇，好似車廂曉自轉嘅日產Pivo2、豐田科幻版Hiace等，睇見都想笑！所以首日就先介紹呢堆「冇得賣都要埋嚟睇吓」嘅ConceptCars，作為大家嘅開胃菜。
記者：鄭達基
攝影：譚盈傑、鄭達基
鳴謝：合誠汽車、皇冠汽車
古怪得嚟夠實用
NissanPivo2
要數全場騎呢之最，相信非日產嘅Pivo2莫屬；外形徹徹底底奉行渾圓設計、四個轆凸晒出嚟Cute上加Cute，車廂部份更可作360度自轉，方便司機前進或後駛。其實咁嘅Design都幾騎呢，試想像一下，若然司機童心大發，停喺燈位無聊時想玩嘢，忽然間將個車廂轉一圈，好似機動遊戲嘅咖啡杯咁氹氹轉，肯定嚇走晒附近嘅車！
以上當然係講笑喇，唔玩嘢時其實自轉車廂都大有用途，如直插L位，出入都毋須瞻前又顧後，懶人或泊車盲最啱；另外若遇到超窄橫巷，㩒吓個掣亦一樣可以掉到頭，唔使倒後行十幾個車位，仲方便過綿羊仔呀，陰功！呢點亦係㗎仔概念車優勝之處，唔似歐美概念車咁，一味喺造型同規格上度Concept，日本人諗嘅嘢體貼兼實際好多。
科幻版Hiace
ToyotaHi-CT
近年力求新車造型設計年輕化的Toyota，在今屆東京車展會場上展出了針對年輕人市場而設的概念車──Hi-CT！外形設計有點同廠Hiace車系影子的Hi-CT，驟眼看來有點像部小型貨櫃拖頭，因它的車尾部份設有可裝拆的尾箱，懶理運載的貨物是零碎的，還是一部單車，也可放在車尾隨你到處去。另外，車子還加入了Plug-inHybrid系統，你可使用家中的插座替其充電，從而令車子變成混能又或全電能驅動，認真環保！
雙轉子新生代
MazdaTaiki
為延續旗下跑車的風采，Mazda在會場內便展出了最新的Taiki概念跑車，一如當年的Ryuga、Hakaza等概念車，Taiki也擁有一個極其流線型的賣相，其中後輪更屬拋出式設計，加上廠方特別為它安排的一台新一代RENESIS雙轉子引擎，那正好展現出它的高性能跑車身份。
車尾變櫃桶
NissanNV200
Nissan在展館的另一方，展出了名為NV200的概念客貨車，別看輕它外表只是一部普通不過的客貨車，原來載物空間活像家中的抽屜一樣，提存物品時只要在車尾拉一拉，整個儲物櫃就可以完全拉出，加上儲物櫃內還設有多個小格，擺放不同種類的物品（如潛水用品），可謂最適合不過。
攀山走石高手
DaihatsuMUDMASTER-C
MUDMASTER-C的尾箱大得連兩部爬山單車也容得下外，更可將之變成一部Pick-up，方便加上吊臂運載貨物；至於高達370mm的離地距，更方便它在崎嶇不堪的路段行走。車廂方面，錶板和中控台也用上大屏幕LCD，以簡潔和實用行先。
娛樂性豐富
NissanR.D/B.X
正名為RoundBox的R.D/B.X，被譽為新一代開篷車代表，車上乘客可透過PlayCatch系統，讓前後排乘客互換插放中之音樂及電影等，娛樂性比現有開篷車高一截。
車櫳變草地
ToyotaRiN
Toyota這款RiN，全長3,250mm，車上玻璃全採用大面積設計，不過最特別還是車廂的地台用上類似草地的設計，與設計特別的軚盤相襯起來，觀感可謂特別得很。
SUV一樣辣
SuzukiKizashi2
Kizashi2是部極富跑格的潮爆SUV，不但擁有低矮而流線造型，動力心臟更是3.6公升V6引擎，附以6前速全自動波箱和最新的i-AWD四驅系統，性能無可置疑。
電單車都塞得落
SuzukiX-HEAD
SuzukiX-HEAD看來像Hummer軍車，Cyber味濃及雙天窗設計，尾斗載物空間也不少，就連一部迷你電單車也可容得下，而旁邊更有儲物格方便存放雜物。
睇完真車 揸《GT5P》止渴
PS3踩入車展，喺現場中擺咗幾部《GT5Prologue》畀入場人士試玩，跟已公開下載嘅試玩版一樣，日產GT-R仍是以BlackFace版（黑布遮着車頭及車尾）登場，可能明天會以正式版亮相。
