唔到你唔服，薑真係越老越辣。去季意甲冠軍國際米蘭，憑費高同基斯普嘅精采表現，玩謝主隊莫斯科中央陸軍之餘，亦顯示佢哋夠薑夠辣嘅風格！
中央陸軍由祖奧32分鐘先開紀錄；滿以為係好開始，豈料52分鐘，國米防中甘比亞素頭槌頂前，成班陸軍守將「震騰騰」跣後「助攻」，老將基斯普見機不可失，快步衝前怒射成1:1。然而，「士哥」後10分鐘，基斯普俾教練文仙尼換走，面露不悅之色兼俾鏡頭拍到，睇嚟佢同教練有啲「牙齒印」，冇面畀，夠薑！
年屆32歲嘅基斯普雖為國米追平，但都唔夠費高威！呢場波係下月4號年屆35歲嘅費高，繼魯爾、卡路士、碧咸、馬甸尼同簡尼後，第6位喺歐聯上陣第100場嘅經典名將，認真唔講得笑！
費高「化骨綿腿」夠賤
更唔講得笑係，該葡萄牙翼鋒多次沉底發難之餘，亦表現出老波骨本色（又名陰濕）；完半場前，佢同敵衞阿歷斯比里蘇斯基埋身拍波，唔拍猶自可，一拍見真章，後者慘遭費高好無品咁以「化骨綿腿」印中，令左腳小腿近足踝位置出現近4厘米長嘅血痕，非常肉酸。該守將事後迅即傷出，而費高只係黃牌了事！你話陸軍係咪俾佢玩死？
而另一老將韋拉就玩死文仙尼！佢今季首次為國米正式上陣，短短17分鐘就扭傷右腳小腿，球隊真係有排煩！
講開又講，陸軍門將文廸堅完場前10分鐘好似「鬼上身」，對住森美爾頂得極為正中嘅頭槌，都可以俾個波從手指隙漏入，令球隊3分全失；唔通真係萬聖節殺到，邪力迫人？