前嗰排被傳媒撞破，同朱玲玲十指緊扣睇《色，戒》嘅瑞安主席羅康瑞，噚日出席由佢公司贊助600萬銀嘅「全人教育基金」活動，又被人影到佢同一位女士十指互扣。不過，唔係朱小姐，而係同老公專登去踩場，要見羅康瑞一面嘅勞太！
勞太係邊位？佢老公勞生係羅康瑞舊夥計，今年年過八旬，80至83年嗰陣喺羅康瑞間公司打工，呢份工亦係佢退休前最後一份工。當佢聽到舊老闆會出席呢個活動，就戙埋支枴杖帶埋老婆一齊嚟撐場。
勞生等咗好耐，等到活動完都未能埋到羅生身，都怪華華同羅康瑞傾到雞啄唔斷。
戙埋枴杖支持
勞伯伯終於忍唔住，主動開聲同舊老闆打招呼，仲當場話老闆從來唔發脾氣，唔鬧夥計，但佢又突然爆響口話，咪睇羅老闆外表斯文，內裏其實好打得，皆因羅生係詠春高手。
被舊夥計公開讚到上天，羅康瑞開心到不得了，但華華跟手想再問多兩句，羅生就耍手擰頭。睇嚟羅主席唔止詠春叻，耍太極都有一手！