數碼達人:<br>《審判魔眼》一眼盯緊 掌上獸對戰

數碼達人:
《審判魔眼》一眼盯緊 掌上獸對戰

堪稱「真人版遊戲王」嘅《審判魔眼》(EyeofJudgment),已正式推出,聽日更可上網同各大高手比試,令呢個自發表以來一直備受關注嘅話題瞬即大受PS3機主談論。無他嘅,佢玩卡之餘仲送埋全新版一代PSToy,單憑呢隻眼辨認卡片從咩轉化做電子數據,喺螢光幕度直接反映出嚟,真係難以置信咁勁揪嘅高科技設計,就算唔買嚟玩都要試吓啦!

文:陳福榮 攝影:陳偉強

一「眼」關九

成六百幾蚊買隻Game返嚟,當然唔會只得光碟畀你玩咁簡單,《審判魔眼》嘅着眼點就包括一副包含魔獸卡與魔法卡嘅StarterPack、4張行動卡、一張擺卡用嘅靚靚遊戲玩墊同埋最重要嘅PSEye,由於冇咗呢隻「眼」去讀卡隻Game已經唔使玩,所以一定要好好呵護佢。

■喺試玩當日,SCEH就擺咗個咁嘅陣等小弟安心享受玩卡樂趣。

《審判魔眼》嘅獨特之處,唔係遊戲玩法激似《遊戲王》撈《MagictheGathering》咁簡單,佢可以求其望吓張卡就辨認到係乜東東,仲同步喺畫面顯示埋佢個模樣、對住咩方向、閣下有冇偷雞換卡咁,可想而知遊戲本身係記錄晒玩家每個微細舉動,高科技到難以置信。差啲唔記得講,為咗可以有效咁打擊對手,大家可以另買BoosterPack嚟強化自己手上副牌,鑑於唔少屈機勁卡都要畀錢先至買到,想一副Starter獨步天下?你都咪使旨意!

■張「枱布」係擺放卡片畀PSEye辨認,每個位置都要一絲不苟。

■喺卡片檔案模式裏,可以逐張卡咁去了解一吓個遊戲世界觀係乜。

■至於審判模式則是單純咁拎啲卡嚟互相比拼威力,不涉及環境因素。

「瑪那」數量決勝負

《審判魔眼》個基本遊戲原理係極似Hit咗好多年嘅Magic卡,只不過勝利條件一係殺晒對手全部30張卡,又或者係地盤霸咗其中5格。因此點都唔可以任由對方落卡,喺儲嘢備戰之餘都要出下卡搞破壞,否則係咁Pass你就好快玩完。
呢隻Game類似Magic卡,用法同能力描寫都熟口熟面,有直接出招隊人,有只曉得隔山打牛,亦有支援型嘅輔助魔法,每個行動都要消耗魔法能量瑪那(Mana),用勁廢嘅「3血1攻」至少都要用1粒瑪那,掌握到如何用垃圾卡引蛇出洞,幾時儲夠瑪那召喚有條件限制、最屈機嘅9粒瑪那封印獸,就成為勝負重要關鍵。火、水、土、木、機巧五者互有利害關係,相同屬地位置放卡會有着數,反之就至少扣兩滴血。魔獸本身血唔算多,少兩滴隨時即死,必須多加留意。

■發動咗卡牌攻勢後,就會即時呈現靚到爆燈、誇張到震嘅召喚場面。

■屬性卡牌會喺相應嘅地形發揮最大能力,反之就會倒扣得不償失。

■若想同人網上對戰,就要事先登錄StarterPack以外嘅屈機靚卡。

揸牌規矩咪亂嚟

雖然講到隻「眼」好犀利,張卡係點只要畀佢昅吓就一清二楚,要將張卡放喺九宮格入面停定兩、三秒,咁佢喺辨認期間就會出現倒數時間計,數完代表搞掂。至於代表落實行動或者完成回合嘅操作卡片,大家可以托住張卡擺係鏡頭下,唔使規定擺放角度都會認到,有時當儲得太多卡要消滅其中一張都係咁玩法。
托住張卡Show俾鏡頭睇,切記隻手唔可以遮到張卡上同下嘅任何深色部份,皆因隻「眼」係檢查barcode嚟判斷到底佢係咩卡,所以一定要托住卡底。

■平時未出卡之前,玩家係可以當玩啤牌咁揸住成手牌嘅。

■切忌遮住PSEye檢查卡片上下方嘅深色部份。

■遊戲畫面一時間直接反映出啲卡係面向咩方向。

機種:PS3
廠商:SCE
類型:TAB
人數:1-2人(網上對戰2人)
日期:已推出
售價:$645