明年開始，喺大陸肯德基就可以飲到蒙牛（2319）牛奶。美國連鎖快餐企業肯德基宣佈，下年開始喺全國2000家肯德基供應蒙牛液體奶，仲唔排除日後有酸奶或者共同開發嘅產品。雖然之前蒙牛輸咗畀伊利，痛失奧運指定飲品專利，但係今次拍到肯德基呢個碼頭，宣傳效果同奧運應該不相伯仲。
其實，肯德基一直用緊雀巢作為中國牛奶產品供應商，增添地頭蟲蒙牛之後，肯德基品牌經理朱宗毅話，同雀巢仲會繼續合作。
姻緣早牽紅線
蒙牛成為美國品牌嘅大陸供應商都唔係第一次，今年初就成功取代雀巢，成為星巴克北京咖啡店牛奶供應商。睇嚟蒙牛真係越戰越勇，唔單止銷量打敗本土競爭對手伊利，就連供應產品都打敗國際對手雀巢。
咁究竟蒙牛有咩懾人魅力，打動肯德基芳心？原來肯德基一早就加入「中國牛奶愛心行動」，以行動力撐蒙牛；蒙牛都好識做，其後又加入「肯德基全國青少年三人籃球冠軍挑戰賽」，以營銷推動雙方品牌。原來雙方一早情根深種，怪唔得一拍即合啦！