阿蘭拿斯出口術
一向聲大大嘅巫師射手阿蘭拿斯今季再「開金口」，揚言今季會一場射入70甚至80分，仲話要攞埋個MVP㖭！上季初同湖人嘅拜恩鬥多分，一場入4、50分閒閒哋嘅「AgentZero」，經常表演一射定江山、反敗為勝，一度被視為MVP大熱門。點知自從明星賽後，阿蘭拿斯因傷狀態下滑，喺季後賽前更加因膝傷缺陣，搞到巫師首圈出局。阿蘭拿斯今季復出，先出口術攞頭威，祝佢今季唔好又臨尾香喇！
「波神」正宗黑腳？
山貓自04年度創會後，成績一直令人失望，球會班主之一「波神」米高佐敦，上年發公開信畀球迷，承諾會全力搞好隊波。可惜今季一開始，主將摩里遜同美亞喺季前熱身賽受傷，未開季已提早收「咧」；睇嚟「波神」嘅承諾兌現唔到之餘，成績隨時仲差過上季。尤記得2000年「波神」入主巫師後球隊成績越來越差，最終喺03年被炒，大家即管睇吓呢位「籃球界比利」係咪真係咁犀利，掂嗰隊死嗰隊！
萊利教耆兵愁更愁
0-6！呢個係熱火喺季前賽嘅戰績：6戰全敗。8！呢個係熱火目前嘅傷兵人數，當中包括獲廸、奧尼爾、積遜威廉士、夏達威同杜里亞等。𠵱家最愁嘅肯定喺熱火教練萊利，佢老人家除咗要應付傷兵滿營同兵敗如山倒嘅問題，仲要面對球員老化。熱火上季係聯盟平均年齡第4高球隊（28.19歲），今季加埋36歲嘅夏達威，就算呢班「老餅」𠵱家冇病冇痛，到季尾都隨時臨尾香，唔知萊利有冇後悔係季前承諾教多熱火3季呢？
懷特侯活6.6億抵
04年新秀狀元懷特侯活同魔術剩番一年約，球會為咗留佢，提早同佢續咗一份5年總值8,500萬美金（約6.6億港元）嘅巨額合約。有輿論話魔術出價過高，侯活根本唔值呢個天價。其實呢個價絕對物超所值，事關佢上季平均攻入近17分同12個籃板，仲首次入選明星賽。但最令人匪夷所思嘅喺，侯活喺過去3季從未試過因傷缺陣，打足82場常規賽，即連續上陣246場，仲未計季前賽，所以話侯活抵到爛！