由森美同吳日言主持嘅無綫遊戲節目《開森玩家》，噚日喺將軍澳電視廣播城錄影，楊思琦、鄭融、唐詩詠、小儀同許紹雄等擔任嘉賓，由於適逢萬聖節，所以噚日個個人都以鬼怪造型出現。
楊思琦勇戰受傷
眾嘉賓玩遊戲環節時都搏晒命，小儀玩「蒙面呃人」嘅環節，先後三次抽中被人仆儍瓜，雖然唔係俾人用棍仆，但係用剃鬚膏捽都幾慘，整到佢成面同鼻窿都入晒剃鬚膏，不過佢都玩番許紹雄冇蝕底。而楊思琦應該係最黑仔嗰個，喺玩拉橡筋時，就成個跌落地，之後仲俾許紹雄失平衡又成個人壓喺佢個頭度，令佢整傷隻手，而喺玩「開心滑啫啫」中又連人帶水泡成個人跌落水池，成身濕透，問到佢覺唔覺自己黑仔時，佢話：「我又唔係好介意，不過都好好玩而且又有獎品。」雖然，鄭融玩拉橡筋跌低冇受傷，不過佢就甩褲露股罅，儀態盡失咯！
無綫收視大跌市
此外，森美演出嘅無綫節目《森之愛情》，上個禮拜收視大跌，平均收視只得15點（即97萬人次收看），下跌4點，約流失26萬觀眾，希望今次森美做番拿手嘅主持，唔會再失威。至於台慶劇《奸人堅》同《通天幹探》都跌咗，大家都只得27點（即175萬人次收看）收視，真係失威。
