曉士同冠軍指環無緣
正所謂「牡丹雖好都要綠葉扶持」，要攞總冠軍除咗要球星孭飛之外，都要其他球員協助先可以成就大業，好似米高佐敦都要靠柏賓同洛文先至可以前後贏到6隻冠軍指環。騎士兩個綠葉後衞曉士同史奴，兩人都分別喺76人跟過艾華遜，到𠵱家跟住「大帝」占士，佢哋上季幾乎可以一圓冠軍夢，點知俾馬刺喺總決賽以直落4場掃出局，搞到兩人差唔多重蹈喺01年總決賽先贏湖人1場後、連輸4場出局嘅厄運，唔通真係注定佢哋同冠軍指環無緣？
韋伯誓死效忠活塞
上季幫活塞贏得東岸常規賽冠軍嘅韋伯，到𠵱家都仲未落到班；原來活塞今季陣容已有人滿之患，要放走穆罕默德或者朗奴梅利，先有空間容納呢位34歲嘅老將。韋伯為咗繼續留喺家鄉底特律，之前仲推咗希臘一間球會，以過千萬年薪請佢過檔嘅要求，仲話如果活塞唔要佢，寧願退休都唔會他投咁話喎！眼見𠵱家啲NBA球員個個見利忘義，有錢有得傾、冇錢就走人，難得韋伯對活塞如此忠心耿耿，活塞管理層應該識做喇！
「大賓」有頭帶生猛晒
以防守力強見稱嘅賓華萊士，上季由活塞過檔公牛後，無論搶籃板（10.7個）同封截（2.0次）都係自00年以來嘅新低。點解「大賓」突然跌watt？鬼咩！公牛教練史佳斯上季一直唔畀「大賓」戴頭帶比賽，搞到佢冇晒癮之餘，上季成季都被迫披頭散髮打波，連佢最鍾意嘅招牌式「頭戴爆炸頭」都set唔到，打波時梗係冇以前咁起勁啦！好彩公牛一班隊友今季「投票」決定，畀番「大賓」戴頭帶上陣，睇嚟今季「大賓」或者會有爆炸性演出！
「小奧尼爾」愛玩嘢
溜馬主力謝美恩奧尼爾由初出道人人叫佢做「小奧尼爾」，叫到𠵱家都就快3張嘢喇！但係打咗咁多年，都仲係連總決賽都入唔到，莫講話奪標。之前佢又同球會扭計，話要請啲球星返嚟幫手攞總冠軍，而最近又傳聞話想過湖人拍高比仔，不過到𠵱家都仲係走唔到。不如安守本份留喺溜馬啦！話晒人哋當年喺拓荒者個後備席度執你返嚟，兼夾畀個正選位你打，你先可以好似𠵱家咁威喺溜馬做大佬，記得飲水思源呀！