報紙報道，香港出現人才荒，一位本地女生在大學讀國際關係，講廣東話、英語、些少普通話，樣貌唔錯，態度甚好，有幾年工作經驗。呢位女生今年八月想轉工，一搵之下，立即收到四份聘書，其中兩份工嘅薪酬條件遠勝目前。獵頭公司話，三分一僱員平均每份工只做兩年，令僱主大為頭痛。
星期四晚飯局上，三位不同機構嘅高層齊聲話請人好頭痛，唔知去邊度搵，特別係好男仔奇缺。三位主管之中，有兩位係女士，佢兩位差唔多想唱首歌畀左丁山聽，就係老牌勁歌「WhereTheBoysAre?」如果唔係識佢哋咁耐，左丁山仲以為佢哋想搵男朋友拍拖㖭。
L女士話：「我哋部門實在太多女仔嘞，性別比率不平衡，分派工作時總係覺得多幾個男仔會好啲。」男主管C就請到唔少「靚男」喎，有乜好計呢？哦，原來佢願意犧牲部份時間，返母校教書。一早在學生之中揀到啲俊男，學生未畢業已經俾佢斟掂。
大學內，女生多過男生，完全不是新聞，但都有男生㗎，為何請唔到？L女士話：「見工嗰陣，好多男生竟然披頭散髮，着T恤波鞋，女仔就着得比較四正，有少少化粧，自不然較為合眼緣。我哋見男生面試，要求唔係咁高㗎咋，仍然揀唔到多幾個。」
主管C就嘆氣：「我讀大學時都唔係衣着光鮮，但去見工返工，起碼穿得整齊吖，但今年暑假嚟咗一啲工程學院學生做實習，有啲竟然着人字拖短褲返工，話怕熱喎。我立即對人事部講，叫佢哋返屋企嘆冷氣好過。」左丁山估唔到今天之大學生，竟然有這類十分散漫、過份個人化之人，雖則話社會風氣如此，見工返工之時，加少少禮貌都得啩？大學方面，似乎要每年為啲三年班生開番一個學分嘅必修科──基本禮儀喎。
睇完報紙，聽過啲主管之言，發覺大學男生今年搵工會好容易，只要佢哋識講中英文，識啲禮貌，叫阿爸畀錢添置番一套西裝恤衫領呔黑皮鞋（打呔都識啩？），見工之時唔好口窒窒，份工已經有七分光景咯。