何韻詩與Soler前晚在九龍站出席牛仔褲店舖開幕禮，Rosemary與男友Christopher、吳嘉龍及莊思敏等也有出席，阿詩表示今次任嘉賓酬勞甚豐，她說：「呢排經濟起飛，收入可觀咗，進賬不少。」
已不再是窮歌女？阿詩說：「我孤寒成性，慣咗節省，有錢唔識使，我都有叫阿媽幫我投資，但唔會買股票，要保險啲，或者買金條保值，留畀阿媽搞。」阿詩謂以往家人曾買股票損手，故有陰影不敢再買，她最想在半山區買千呎豪宅。
Soler表示很高興得該商店老闆賞識，即使有合約官司，也找他們演出，有如黑暗中現曙光，現正傾談擔任代言人，稍後他們會任亞姐嘉賓，Dino謂：「我哋同無綫冇約，應該唔會得罪佢哋啩，無綫冇咁小器。」
採訪：駱華齡
攝影：陳順禎