有上海「天價樓王」之稱嘅湯臣一品，向來都新聞多多，華華噚日睇大陸報紙，見到有關佢嘅報道。今次唔係講天價賣樓，而係天價車位。湯臣一品嘅單套公寓閒閒地過億銀一間，至於車位都唔平，要50.5萬人仔一個。據報道話，附近個樓盤盛大金磬花園一個車位不過28萬人仔，差唔多平一半。
咁貴嘅車位邊個會買？目標買家當然係湯臣一品嘅業主，而根據規例，車位只可以賣畀屋苑業主。嗱，湯臣一品嘅單位同車位比例係1比2，冇錯，報道話，呢個屋苑有200幾套公寓，至於放上網放售嘅車位就有429個，發展商講明「並無保留」。
冇緊要，成億銀買個公寓都畀得起，百零萬人仔買兩個車位，濕碎啦。又係報道話，05年10月及06年8月賣過兩次之後，湯臣一品都係得3個買家。最弔詭係，湯臣一品一共有4棟住宅物業，發展商推售兩棟，其餘兩棟留番收租，咁即係又少一半目標車位買家。
賣唔成 可放租
難怪大陸地產界有人估，湯臣話賣車位只不過係講呀，轉頭就會將啲車位租出去，以陸家嘴搵車位咁艱難嘅情況睇，湯臣如果租到15蚊一粒鐘，一日租到8粒鐘，每日就有120蚊收入，一個月3600銀，每年租金回報超過8厘，幾和味。