股市單日跌過千點，唔代表個個都要哭股喪，代替已故「小甜甜」龔如心，被《福布斯》選為亞洲最有錢女人嘅碧桂園（2007）太子女楊惠妍，噚日正好係「任憑（股海）風浪起，穩坐釣魚船」。
大陸房產股企硬
當其他超級富豪賬面身家唔多唔少都蒸發咗啲嘅時候，噚日大陸房地產股冇俾大浪冚到，其中碧桂園股價雖然同大市一樣，裂口低開，最低跌到去11.24銀；但之後就成支火箭咁升番上去，一度倒升見過12.58銀；最後收11.78銀，冇升跌，真係堅過石堅。
今個月初，《福布斯》公佈最新中國富豪名單，據佢哋統計，楊惠妍個人淨資產高達160億美元（即1248億港元），成為亞洲女首富。楊惠妍係碧桂園董事，美國俄亥俄州立大學畢業，𠵱家主要參與公司物流同採購項目工作。佢揸住95.2億股碧桂園，約佔發行股數58%，按噚日碧桂園收市價11.78銀計，賬面身家高達1121億銀。