澳門開放賭業之後，成個埠嘅步伐都加快咗，不過呢啲都係表面情況，好似喺香港，去便利店交水費、電費、電話費唔係新奇事，但對於一個「大海」之隔嘅澳門，就係突破性嘅服務，今個月底先正式開始。
月底開始可找卡數
將呢個服務引入澳門嘅，正係獅子銀行──滙豐，佢哋係幕後搞手；至於喺前線收錢嘅，就係當地30間廿四小時營業嘅「七仔」！獅子行仲帶頭力撐，旗下信用卡卡主，可以直接去便利店找卡數，希望咁可以吸引多啲商戶用呢個新服務。
滙豐話，佢哋係當地第一家獲得澳門金管局批准，搞呢種收費服務嘅銀行，家吓好落力咁搵多啲新商戶加入，好似保險公司、水電煤機構、電訊，同埋啲慈善團體咁。