中國11億人口，要乜人才都有，偏偏具國際投資市場經驗嘅，又真係唔多，相信同市場向來封閉有關。家吓大陸經濟熱成咁，企業要搵呢方面嘅人才，已經唔可以靠搶靠挖角，既然今日中國嘅經濟逐漸同世界接軌，好多企業都已經「走出去」，招聘人才當然都可以「走出去」搵。
招聘會百人應邀
好似由中國建銀投資同摩根士丹利資本國際等國內外知名金融機構，聯合成立嘅中國國際金融公司（簡稱中金），就成為咗第一家走到去美國招聘人才嘅大陸合資券商。
華華噚日睇《東方早報》報道，今個月初，中金喺紐約華爾街附近嘅Ritz-Carlton搞咗個大規模招聘會，目標梗係華爾街班人才啦，據講有成百人應邀面試，當中唔少都係海外華人，啱嘅，話晒自己人易傾啲嘛！
中金董事總經理丁瑋話，年底前想請多200人，到時成條team就有1000人，風險管理、產品設計、管理人都有空缺，簡單啲講，即係乜人都要。