胡潤中國富豪榜每日公佈一個界別嘅富豪名單，噚日講到零售。嗱，公佈結果之前，先講吓古仔，胡潤呢個榜其實係百富榜嘅分支，今年已經係第4年公佈，前3年零售富豪榜排頭位做首富嘅，都係國美電器（493）主席黃光裕，所以今年零售業首富好多人都估黃光裕會蟬聯。
sorry，估錯嘞，今年俾佢個死對頭──蘇寧電器張近東爬頭。
贏身家兼市值
第一次喺呢個榜做阿一嘅張近東，以370億人仔身家，揮低只有280億嘅黃光裕，足足多出三成。贏身家都不特止，就算計公司市值，又或者上榜人數，蘇寧同樣贏足成條街！
睇返個排行榜，蘇寧市值有970億人仔，係內地最大嘅民營零售公司；國美排第二，但只係得550億人仔市值，大比數被拋離。
仲有，蘇寧有7個代表入榜，國美就只得兩個代表上榜，可見蘇寧一家公司養起多啲富豪，睇怕做咗3年一哥嘅黃光裕，應該輸得心服口服！