唔係隻隻新股都好似新鑫礦業（3833）咁，股價升成倍，好多第一日掛牌都只係升幾成，高追嘅散戶分分鐘坐艇，好似網友Tphoneboy咁，「買咗隻大昌行（1828），5日都頂唔到，就跌破招股價。」knight76仲慘：「今年中信3寶：中信1616（1883）、中信銀行（998）同大昌行，全部抽中晒，全部輸到一仆一碌，一生人好難再承受多一次呢啲咁嘅經歷，會癲㗎！」
貨源歸邊變歸西
Emailarchun就話：「今年最衰嘅新股，群星紙業（3868）真係不二之選，日日跌，以為可以撈底，點知今日最低，等於聽日最高。」咁又真係幾谷氣嘅。6969haha就話：「群星直頭不知所謂，又話貨源歸邊，我話貨原歸西就真。」
Waterwaterpig呻：「早排抽隻波斯貓（3998，波司登），好似無食貓糧咁，之前就唱到好勁，最後都係雷聲大雨點小。」波司登上市至今較招股價下跌近4%。不過講到最慘，都係入咗德普科技（3823）嘅Genius819，「上市到家陣，股價差唔多唔見咗一半。」