上個月21號掛牌嘅恒鼎實業（1393），上市啱啱夠一個月，股價表現雖然「靚仔」，但不幸事件浪接浪，上市前先有匿名人喺大陸登廣告，兜售2000萬股份，搞到管理層要出嚟解畫；上個禮拜，禁售期都未過，持有恒鼎11%權益嘅機構性投資者霸菱，喺未有通知該公司情況下出售權益，搞到董事會好遺憾。呢啲雖然都係麻煩事，但總可以解決。
執行董事遇事禍殉職
不過，唔知係咪真係「福無重至，禍不單行」，噚日華華睇到恒鼎嘅通告，就好感觸，恒鼎執行董事兼財務總監涂小玉上個禮拜四重陽節前夕，喺貴州出差途中，遇到交通意外身亡。
𠵱家財務總監個位，由公司主席鮮揚臨時頂上，再慢慢物色合適人選，董事會一星期內先後發出遺憾同埋悲痛嘅公告，華華希望恒鼎否極泰來，連串不幸事可以畫上句號。