康華（Akina）皮膚好得過份，如牛奶般又白又滑，說話溫婉聲線嬌柔，舉手投足流露迷人魅力。最近剛播完嘅《舞動全城》，康華又再飾演勾引于洋嘅姣秘書，就如過往大堆二奶、第三者等壞女人角色一樣。查實康華屬演藝學院舞蹈系畢業生，舞蹈底子不遜於同劇幾位主角，可算係靜如處子、動如脫兔最佳例子。
之不過康華外形高貴，予人花瓶錯覺。想着想着，感覺伊人跟上流名車BentleyAzure本質相當貼近；Bentley由一「出生」就已經係英國皇室貴冑及富豪御用車，仲係女皇座駕㖭，高貴品味無可置疑；唔單止睇得亦同時砌得，試過喺僅次F1賽事嘅法國LeMans24小時耐力賽入面，連續幾年奪魁成長勝將軍，亦曾經係勞斯萊斯嘅姊妹品牌，所以Bentley絕對係一部超級豪華跑車。
記者：梁美甜 攝影：伍慶泉
情傾古董開篷車
6至02年生產，當年新車落地要成500幾萬，夠買千呎豪宅，加上已經停產，就顯得更加矜貴！連陳奕迅亦視Azure為DreamCar亦不無道理。
「好有味道，好靚！好鍾意！」康華見到Azure第一個反應係邊輕摸車緣邊說。由於見到康華駕着Peugeot雙門軟篷車到來，即時聯想到佢係咪鍾意開篷車嘅人呢？「係吖！係吖！我好鍾意開篷車，架車唔係開篷我一定唔會鍾意㗎！」康華眼仔睩睩笑住答。怪不得第一眼見到Azure就話靚又話鍾意，都係因為個篷！「唔止個篷，古董車我一樣咁鍾意！」即係話古董嘅開篷車就一定鍾意啦！「古董車好貴，如果係開篷就更加貴，坐吓揸吓已經好滿足，第時搵到錢至買番部獎勵自己。」
超搞笑手動軟篷
超級開篷車迷康華都試過因為個篷鬧笑話，「試過一次買車，我同Sales講部車無論如何一定要開篷，要型兼唔可以隨街都有，點知當時只得一部符合我要求，不過個篷要自己搬嚟裝同拆，得一部都要買啦！」嘩！咪好麻煩，遇到落雨嘅話咪仲煩！「係超級麻煩，成日搬嚟搬去又煩又攰，朋友就當笑話成日笑我囉！」邊模仿搬篷動作邊解釋着嘅康華，笑容同表情都未停過！
「仲試過有一次揸車喺中環經過，見到個朋友，呢頭打緊招呼SayHi，嗰頭個朋友就唔見咗，原來已經跳咗上車啦，勁搞笑！」
軚盤重但轉向靈敏
Bentley不嬲都無Sample車借畀傳媒試，今日呢部Azure都係富利堡借出嚟，先可以同康華影番輯相，事後佢更喺加多利山兜咗一Round㖭！「我有個心態，坐喺架車度就曉飛，所以好鍾意開篷嘅開揚舒暢感覺，Azure雖然唔後生，但係起步好夠力兼且盤軚好定，操控唔錯喎！」
Azure有成385匹馬力絕對跑得，軚盤固然比房車重，但轉向反應敏感，轉彎亦非常靈活，就算係乘客坐後座都好，空間一樣咁闊落，加上真皮座椅舒服過人，開住篷係街上跑，嗰種成熟貴氣又不失型格魅力，乜嘢人都會轉頭望兩眼喇！
96BentleyAzure規格
引擎：6,750c.c.V8Turbo
馬力：385ps/4,000rpm
扭力：72.0kgm/2,000rpm
傳動：4前速自動波，後輪驅動
0-100km/h：6.3秒
極速：250km/h
查詢：富利堡（28772700）
